YUNANISTANDA BÜTÜN AZARKEŞ KLUBLARI QADAĞAN EDİLDİ
AZƏRTAC Röyterə istinadla xəbər verir ki, Yunanıstan Futbol Federasiyası (YFF) bütün komandaların azarkeş klublarının fəaliyyətinə qadağa qoyulması haqqında qərar qəbul etmişdir. Bu tədbir stadionlarda zorakılıq hallarına və azarkeşlər arasında toqquşmalara qarşı mübarizə çərçivəsində görülmüşdür. Belə ki, martın 29-da baş verən sonuncu kütləvi savaş zamanı bir azarkeş həlak olmuş və doqquz nəfər xəstəxanaya qoyulmuşdur.
YFF-nin təşəbbüsünü ölkənin bütün klublarının rəhbərləri dəstəkləmişlər. Azarkeş klublarında aparılmış sonuncu yoxlama zamanı onların fəallarından “bütöv bir cəbbəxana” aşkarlanmış və bununla əlaqədar federasiya əlavə təhlükəsizlik tədbirləri görülməsini təklif etmişdir. Məsələn, növbəti mövsüm başlanana qədər bütün stadionlarda müşahidə kameraları qoyulacaqdır.
YFF-nin qərarına əsasən, futbol klubları ilə mütəşəkkil azarkeş qruplaşmaları arasında bütün əlaqə və müqavilələr qadağan olunmuşdur.
Bölmənin digər xəbərləri
