YUNANISTANIN BAŞ NAZİRİ OLİMPİADAYA HAZIRLIĞIN DÖRD MƏQSƏDİNİ MÜƏYYƏN ETMİŞDİR

23.01.2004 [13:09]
Çap et
A⁺ A^-

AZƏRTAC 2004-cü il Olimpiadası Təşkilat Komitəsinin İnternet saytına istinadla xəbər verir ki, Yunanıstanın Baş naziri Konstantinos Simitis ölkənin qarşıdakı Oyunlara hazırlığının dörd məqsədini müəyyən etmişdir.

O, Nazirlər Kabinetinin bu problemə həsr olunmuş iclasında çıxış edərək, Yunanıstanın Olimpiya və Paralimpiya oyunlarını yüksək səviyyədə keçirilməsini və ölkə idmançılarının parlaq nəticələr qazanmasını başlıca məqsəd adlandırmışdır. İkincisi, Oyunların uğurla keçirilməsi yolu ilə dünya ictimaiyyətinin nəzərində Yunanıstanın nüfuzunu qaldırmaq, üçüncüsü, ölkədə ümumi daxili məhsulun və məşğulluğun artmasına təkan verən Olimpiadaya hazırlığın iqtisadi strukturunu qoruyub saxlamaq, dördüncüsü isə, Oyunlar başa çatdıqdan sonra olimpiya obyektlərindən həm idman, həm də mədəni məqsədlər üçün istifadə etməkdir.

Baş nazir bildirmişdir ki, Afinada və daha dörd şəhərdə - Səlanik, Patra, Volos və İraklionda Olimpiadaya hazırlığa 4,6 milyard avro xərclənəcəkdir.