ZAQATALADA ÇAYÇILIĞIN İNKİŞAFI İLƏ BAĞLI KONFRANS KEÇİRİLMİŞDİR
Almaniya Texniki Əməkdaşlıq Agentliyi (GTZ) Azərbaycanda Özəl Bölmənin İnkişafı Proqramı nəzdində Çay bölməsinin inkişafı layihəsi çərçivəsində Zaqatala rayonunda çayçılığın inkişafı ilə bağlı konfrans keçirmişdir. Konfransda GTZ-nin kənd təsərrüfatı bölməsi üzrə baş mütəxəssisi Frans Hainsman, Şri-Lankalı ekspert, çay üzrə mütəxəssis Vice Yohn Pillain, habelə rayon icra hakimiyyətinin bölmə rəhbərləri iştirak etmişlər.
AZƏRTAC-ın müxbiri xəbər verir ki, ərazilərində çay plantasiyası olan fermer təsərrüfatlarının, bələdiyyələrin və çay fabrikləri rəhbərlərinin qatıldığı bu konfrans Zaqatalada çay istehsalı ilə məşğul olan tərəfdaşları birləşdirmək, rayonda çay bitkisinin həm kəmiyyət, həm də keyfiyyət baxımından inkişaf etdirilməsi ilə bağlı plantasiya sahibləri ilə geniş fikir mübadiləsi aparmaq məqsədi daşımışdır.
Layihənin ilkin mərhələsində Zaqatala rayonunda plantasiya sahiblərinə çay bitkisinin budanması və ona forma verilməsi sahəsində əməli kömək göstəriləcəkdir. Sonrakı mərhələlərdə çayın becərilməsi, çay plantasiyalarında seyrəkliyin bərpa edilməsi, həmçinin gələcəkdə məhsulun yığımı, daşınması, emalı, qablaşdırılması və satışı sahəsində də fermerlərə müvafiq texniki yardımın göstərilməsi nəzərdə tutulur.
Layihəyə uyğun olaraq Almaniya Texniki Əməkdaşlıq Agentliyinin (GTZ) xətti ilə bu günlərdə Zaqatala rayonuna çayın budanması üçün lazım olan texniki avadanlıq da gətirilmişdir.
Bölmənin digər xəbərləri
