REGİONLAR
Zaqatalalı müəllimin ekzotik bağı görənlərin marağına səbəb olur
![](/files/galleryphoto/2024/1/1200x630/1704962637810653687_1200x630.png)
![](/files/galleryphoto/2024/1/1200x630/17049626372304140801_1200x630.png)
![](/files/galleryphoto/2024/1/1200x630/17049626374614418597_1200x630.png)
![](/files/galleryphoto/2024/1/1200x630/1704962637645344113_1200x630.png)
![](/files/galleryphoto/2024/1/1200x630/1704962637476887852_1200x630.png)
![](/files/galleryphoto/2024/1/1200x630/17049626375795559552_1200x630.png)
![](/files/galleryphoto/2024/1/1200x630/1704962637112301588_1200x630.png)
![](/files/galleryphoto/2024/1/1200x630/1704962637112995661_1200x630.png)
![](/files/galleryphoto/2024/1/1200x630/17049626371940116979_1200x630.png)
![](/files/galleryphoto/2024/1/1200x630/17049626375920259125_1200x630.png)
![](/files/galleryphoto/2024/1/1200x630/17049626384057331948_1200x630.png)
Zaqatala, 11 yanvar, AZƏRTAC
Fərqli ekzotik meyvələr becərən Zaqatala sakini, günü-gündən maraq dairəsini genişləndirərək qeyri-adi bitki növlərini öz bağında cəmləyə bilib.
AZƏRTAC xəbər verir ki, bu bitki növlərini yetişdirmək, bəsləmək və onlara qulluq etmək Zaqatala sakini Elmira Hacıyevanın hobbisinə çevrilib.
Bura kiçik botanika bağıdır desək, yanılmarıq. Balaca olmasına baxmayaraq, bu həyətdə bir çox fərqli güllər, meyvə və tərəvəzlər yetişdirilir.
Elmira Hacıyeva uzun illər rayonda təhsil sahəsində fəaliyyət göstərib. Bu xanımın hobbisi ekzotik meyvələr və bitkilər yetişdirməkdir. Hazırda onun bağında 10-dan çox ekzotik bitkilər və meyvələr var. O, yetişdirdiyi bu meyvələri həm qurudur, həm də turşular hazırlayır.
Həyətdə qüdrət narı, əjdaha dili, aroniya bitkisi, avakado ağacı, həmçinin su qabağı, luffa bitkisi, qulançar, bölgəyə xas olmayan innab, zirinc, kivi, feyxoa, zeytun kimi ağaclar mövcuddur.
Elmira müəllimə bildirir ki, o, uşaqlıqdan ekzotik bitki və meyvələrə, fərqli güllərə çox maraq göstərib. Sonralar bu bitki və meyvələri özü əkib, becərib, yetişdirməyə başlayıb. Bu meyvələr arasında elələri var ki, bizim iqlim şəraitimizə uyğun deyil. Uzaq ölkələrdən gəlmiş meyvələrdir. Lakin buna baxmayaraq çalışır ki, yerli iqlimə uyğunlaşdırsın. Elmira müəllimə bildirir ki, hara getsə ilk öncə həmin yerdə hansı ekzotik bitkilərin yetişdirildiyi ilə maraqlanır və ondan mütləq əldə etməyə səy göstərir.
Bağa gələn hər kəsin diqqətini məhsuldarlığı və fərqli görünüşü ilə göz oxşayan qüdrət narı cəlb edir. Bitkinin özü bizə yad olduğu kimi onun harada istifadə edildiyini də bilmirik. Lakin qida dəyəri yüksək olan və zəngin vitaminlərə malik olan qüdrət narı Uzaq Şərqdə geniş istifadə olunur.
“Mən bağçamda müxtəlif meyvələr yetişdirməyə nail ola bilmişəm. Buna misal olaraq innabı, kivini, feyxoanı, zirinci, zeytunu göstərə bilərəm. Amma yetişdirilməsinə ən çətin nail ola bildiyim avakadodur. O da inşallah bar verər, yəqin. Bu boyda böyütməyə nail ola bilmişəm. Toxumdan yetişdirmişəm bunu, sonra 2, 3 toxumu yetişmiş zoğu calaq etmişəm, bu calaqdan da bu boyda ağacımız meydana gəlib”, - deyən Elmira müəllimə hər gün yetişdirdiyi bitki və ağacların başına pərvanə kimi dolandığını etiraf edir.
Bu balaca həyətdə Elmira müəllimənin yetişdirdiyi bitki növlərindən biri də luffa bitkisidir. Luffanın içi sürtgəcə bənzədiyindən qədimdə bu bitkini məişətdə istifadə ediblər, hətta bəzi yerlərdə ondan sənayedə də istifadə olunduğu bildirilir. Luffa bitkisi bir illik olduğundan toxumunu hər il yenidən əkmək lazimdır. Ev sahibinin sözlərinə görə bitkinin meyvəsindən keçmişdə nənələrimiz məişətdə qab yumaq üçün istifadə edib.
Elmira Hacıyeva öz bağında çoxlu sayda güllər, meyvələr, bitkilər yetişdirməyə nail olub. Lakin onun üçün yetişdirilib ərsəyə gətirilməsi ən çətin meyvələrdən biri Avakado ağacıdır. Onun yetişdirdiyi son qeyri adi meyvələrdən biri isə aroniya meyvəsidir.
Boyu üç metrə çatan kaktuslar, dibçəkdə yetişdirilən aran meyvələri və birillik ağac növlərini böyütmək üçün səbir, əzm və sevgi gərəkdir. Uzun illər məktəb direktoru olmuş Elmira Hacıyeva hazırda təqaüddədir və bir an belə dayanmadan sevimli həyətində yeni fərqli bitki növlərini yetişdirmək üçün əzmlə çalışır.