“Zara” dünyanın hər yerində mağazalarını bağlayır
Madrid, 12 iyun, AZƏRTAC
İspaniyanın qlobal bazarda gəlirlərinin həcminə görə ən iri pərakəndə satış şirkəti olan “Inditex Group” COVID-19 pandemiyası dövründə öz mağazalarını kütləvi şəkildə bağlamağa başlayıb.
AZƏRTAC xəbər verir ki, bu günədək dünyanın virusdan daha çox əziyyət çəkən 39 ölkəsində 3785 mağazanın bağlanması barədə elan edilib.
“Zara”, “Bershka”, “Massimo Dutti”, “Stradivarius”, “Oysho” və “Pull&Bear” brendlərini idarə edən “Inditex Group” bu ölkələrdə, o cümlədən ABŞ, Çin, İspaniya və Almaniyada əməliyyat fəaliyyətini yalnız onlayn-mağazalar vasitəsilə davam etdirir. Son illər ərzində “Zara” onlayn-mağazaları həm də bir sıra Afrika və Karib hövzəsi ölkələrində açılıb ki, bu da şirkətə 106 bazarı əhatə etmək imkanı verib.
Şirkətdə qeyd edirlər ki, internet-mağazalar bütün bazarlarda ştat rejimində fəaliyyət göstərməkdə davam edirlər.
“Inditex Group”un rəhbərlik etdiyi mağazaların fəaliyyətinin dayandırılmasının hansı itkilərə gətirəcəyi barədə hələ məlumat verilmir. Məlumdur ki, İspaniyada satışlar şirkətin əmtəə dövriyyəsinin 15,7 faizini, Avropanın qalan hissəsində - 46 faiz, Amerikada - 15,8 faiz, Asiyadakı satışlar isə 22,5 faizini təşkil edir. Fevralın 1-dən martın 16-dək “Inditex” brendlərinin satışı təxminən 25 faiz aşağı düşüb.
“Inditex Group” şirkəti onlayn-satışları inkişaf etdirməyi planlaşdırır.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
