“Zirə”nin məşqçisi: “Şerif”i keçmək üçün əlimizdən gələni edəcəyik
Bakı, 8 iyul, AZƏRTAC
“Şerif” tarixi və avrokuboklarda böyük təcrübəsi olan komandadır”.
Bu sözləri AZƏRTAC-a açıqlamasında “Zirə”nin məşqçisi Fərhad Vəliyev Avropa Liqasının I təsnifat mərhələsində Moldovanın “Şerif” komandasına qarşı keçirəcəkləri oyunlar barədə danışarkən deyib.
Mütəxəssis hər iki matçın çətin keçəcəyini bildirib: “Avrokubok oyunlarında fiziki və psixoloji cəhətdən güclü olmalısan. Bir saniyə belə arxayınlaşsan, uğursuzluq yaşaya bilərsən. “Şerif” yeni mövsümə çox iddialı hazırlaşır. Bunu reallaşdırdıqları transferlərdən də görmək olar. Biz isə yeni-yeni inkişaf edirik. Əlimizdən gələni edəcəyik ki, növbəti mərhələyə vəsiqə qazanaq”.
Azərbaycan millisinin sabiq qapıçısı Moldova təmsilçisinin keçirdiyi bütün yoxlama görüşlərini izləyə bilmədiklərini söyləyib: “Bu, rəqibin matçlarını qapalı şəraitdə keçirməsi ilə bağlıdır. Buna görə də əlimizdə yeni oyunlara aid material yoxdur. “Şerif”in keçmiş görüşlərini izləmişik. Bu komanda Çempionlar Liqasında “Qarabağ”a qarşı mübarizə aparıb. Ağdam klubunun oyun üslubu və təcrübəsi onları məğlub etmək üçün kifayət edib”.
Qeyd edək ki, “Zirə” “Şerif”ə qarşı ilk oyununu iyulun 11-də səfərdə, cavab matçını isə bir həftə sonra Bakıda keçirəcək.
Bölmənin digər xəbərləri
