Milli Aviasiya Akademiyasında illik “Fevral məruzələri” başlanıb YENİLƏNİB VİDEO
Bakı, 12 fevral, Laçın Sultanova, AZƏRTAC
Milli Aviasiya Akademiyasında aviakosmik problemlərin həllində gənclərin kreativ potensialının üzə çıxarılmasına və inkişafına həsr edilmiş illik “Fevral məruzələri” başlanıb. Məruzələrin təşkilatçıları - Azərbaycan Respublikasının Təhsil Nazirliyi, “Azərbaycan Hava Yolları” (AZAL) QSC, Milli Aviasiya Akademiyası, Azərbaycan Mühəndislik Akademiyası və “Azərkosmos” ASC-dir.
AZƏRTAC xəbər verir ki, üç gün davam edəcək “Fevral məruzələri” çərçivəsində “Aviakosmik problemlərin həllində gənclərin yaradıcı potensialı” mövzusunda III Beynəlxalq elmi-praktiki gənclər konfransı keçirilir. Konfransın həmsədrləri Milli Aviasiya Akademiyasının rektoru, akademik Arif Paşayev və akademik Roald Saqdeyevdir.
Tədbir iştirakçıları əvvəlcə akademiyanın tələbələri tərəfindən düzəldilmiş təyyarə maketlərinin nümayiş etdirildiyi aviamodelizm sərgisi ilə tanış olublar. Burada, həmçinin “Səma-SKY” jurnalının rəssamı Natiq Qurubəyin əsərləri sərgilənir.
Konfransı açan Milli Aviasiya Akademiyasının prorektoru Ədalət Səmədov akademiyanın rektoru, akademik Arif Paşayevin adından tədbir iştirakçılarını təbrik edib.
Konfrans iştirakçıları fevralın 11-də Moskvada təyyarə qəzasında həlak olanların xatirəsini bir dəqiqəlik sükutla yad ediblər.
Ədalət Səmədov deyib: “Budəfəki konfrans dünyaşöhrətli alim, akademik Roald Saqdeyevin yubileyi ilə eyni vaxta təsadüf etməsilə əlamətdardır. Bu yaxınlarda biz Azərbaycan Gəncləri Gününü, həmçinin Azərbaycanın “Azərspace-1” ilk telekommunikasiya peykinin buraxılmasının ildönümünü qeyd etmişik və akademiyanın rektoru, çox hörmətli akademik Arif Paşayevin ad günü ərəfəsindəyik”.
Ə.Səmədov məlumat verib ki, konfransın işində ADA Universitetinin rektoru Hafiz Paşayev, Rusiya, ABŞ, İngiltərə və Qazaxıstandan gəlmiş xarici qonaqlar iştirak edirlər. “Aviakosmik sahədə mövcud elmi problemlərin obyektiv və hərtərəfli nəzərdən keçirilməsi üçün çox vacib olan bu konfrans gənclərin intellektual potensialının inkişafında mühüm addımdır”, - deyən prorektor bildirib ki, konfrans çərçivəsində gənclər arasında maraqlı elmi diskussiyalar və müzakirələrlə yanaşı, riyaziyyat və fizika, müasir informasiya-kommunikasiya texnologiyaları sahəsində aparıcı mütəxəssislərin ustad dərsləri, “dəyirmi masalar”, habelə akademik Saqdeyevin yubileyinə həsr edilmiş simpozium keçiriləcək.
Azərbaycan Milli Elmlər Akademiyasının prezidenti, akademik Akif Əlizadə diqqətə çatdırıb ki, bu gün aviasiya və kosmik elm həyatımızın reallıqlarıdır. Kosmos dövlətinə çevrilmiş Azərbaycanın bu sahədə yüksək ixtisaslı kadrları məhz Milli Aviasiya Akademiyasında hazırlanır. Bu cür elmi-təhsil mərkəzləri qarşısında qoyulan bütün tələblərə cavab verən bu ali məktəb Azərbaycanın dövlət müstəqilliyinin bərpa edildiyi ilk illərdə akademik Arif Paşayevin təşəbbüsü ilə yaradılıb. Akademik Arif Paşayev və dünyaşöhrətli alim Roald Saqdeyev Azərbaycanda aerokosmik elmin inkişafı üçün böyük işlər görürlər.
AMEA-nın prezidenti xatırladıb ki, Azərbaycanda astronomiya məsələləri ilə hələ 700-800 il bundan əvvəl məşğul olmağa başlayıblar. “Həmin illərdə Nəsirəddin Tusi tərəfindən yaradılmış Marağa rəsədxanası 1957-ci ildən fəaliyyət göstərən Şamaxı Astrofizika Rəsədxanası üçün zəmin olub. Bu gün Şamaxı Astrofizika Rəsədxanası müasir elmi avadanlıqla təchiz olunub, orada quraşdırılmış diametri iki metr olan teleskop isə çoxsaylı mütəxəssislərin diqqətini cəlb edir. Bu rəsədxanada kosmik cisimlərin öyrənilməsinin prioritet istiqamətləri üzrə iş aparılır”, - deyən Akif Əlizadə vurğulayıb ki, bəzi səma cisimlərinə Azərbaycanın görkəmli elm və mədəniyyət xadimlərinin - Tusi, Nizami, Cavid, Maqomayev və başqalarının adları verilib.
Akademik Akif Əlizadə qeyd edib ki, 2013-cü ildən Azərbaycan kosmos dövlətinə çevrilib, hazırda dünyanın 20-dən çox ölkəsi “Azərspace-1” və “Azərspace-2” peyklərinin xidmətlərindən istifadə edir.
O, çıxışının sonunda gəncləri elmi araşdırmalarda fəal iştiraka, o cümlədən Milli Elmlər Akademiyası nəzdində yaradılmış Yüksək Texnologiyalar Parkında startaplar təşkil etməyə çağırıb.
Təhsil nazirinin müavini Firudin Qurbanov hava nəqliyyatının inkişafında Milli Aviasiya Akademiyasının rolu barədə danışıb. Nazir müavini bu akademiyada elm, təhsil və istehsalın bir-biri ilə çox uğurlu şəkildə əlaqələndirilməsini vurğulayaraq deyib ki, bu ali məktəbin alimlərinin tədqiqatları bir sıra elmi dairələrin diqqətini cəlb edir. F.Qurbanov akademiyanın rektoru Arif Paşayevə burada təhsil prosesinə dünyaşöhrətli alimləri cəlb etdiyinə görə təşəkkürünü bildirib.
Sovet kosmonavtikasının inkişafının canlı şahidi olan yazıçı-fantast, jurnalist Vladimir Qubarev “Kosmosa ilk addımlar. Şahidin gördükləri. Biz Yerdən kənara nə üçün uçuruq? Obıvatelin düşüncələri...” mövzusunda məruzə ilə çıxış edib. O, kosmonavtikanın tarixindən danışarkən kosmodromun tikintisi üzərində xüsusi dayanıb. Vladimir Qubarevin sözlərinə görə, kosmodromun tikiləcəyi məkanın bir variantı Azərbaycan olub. Lakin bunun üçün münasib sahə İran sərhədinin yaxınlığında olduğu üçün seçim Qazaxıstana düşüb və Baykonur kosmodromu orada tikilib.
“Biofotonika canlı sistemlərin əsasının öyrənilməsi istiqaməti kimi” mövzusunda məruzə ilə çıxış edən Arizona Universitetinin nümayəndəsi İldar Qabitov biofotonika elminin imkanlarının təbabətdə və farmakologiyada, o cümlədən saxta dərmanların aşkar edilməsində tətbiqindən danışıb. O deyib: “Biofotonika vüsətlə inkişaf edən elm sahəsidir, onun çox böyük bazarı var. Perspektivli bir sahə olduğundan bu elmə külli məbləğdə sərmayə qoyulur”.
Sonra akademik Roald Saqdeyev “Kosmik elmin müasir vəziyyəti” mövzusunda məruzəsi dinlənilib. Məruzədə Sovet İttifaqında kosmosun öyrənilməsi, sovet kosmik çağırışına amerikalıların cavabı, sonrakı dövrdə bu iki fövqəldövlətdə kosmik elmin inkişafı məsələlərindən söhbət açılıb. Akademik kosmos ilə birbaşa bağlı olan informasiya-kommunikasiya texnologiyalarının inkişafı məsələsinə xüsusi diqqət yetirib.
“Aviakosmik problemlərin həllində gənclərin yaradıcı potensialı” mövzusunda III Beynəlxalq elmi-praktiki gənclər konfransının plenar hissəsi Milli Aviasiya Akademiyasının tələbələrinin təqdim etdiyi bədii proqramla başa çatıb.
Üç gün davam edəcək konfransda 8 seksiyada 120-dən çox məruzə dinləniləcək.
Bölmənin digər xəbərləri
