Quba-Xaçmaz bölgəsində fitosanitar vəziyyət təhlil olunub VİDEO
Quba, 27 fevral, Elxan Yusifli, AZƏRTAC
Fevralın 27-də Qubadakı “Fermer evi”ndə keçirilən regional müşavirədə “Quba-Xaçmaz bölgəsində fitosanitar vəziyyət, yastıcalar əleyhinə mübarizənin səmərəliliyinin artırılması və pestisidlərin tətbiqi zamanı qarşıya çıxan problemlər” mövzusu müzakirə olunub.
AZƏRTAC-ın bölgə müxbiri xəbər verir ki, Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən təşkil olunan regional tədbirdə rayon bitki mühafizəsi mərkəzləri və bitkilərin karantini məntəqələrinin əməkdaşları, Kənd Təsərrüfatı Nazirliyinin Aqrar Elm və İnformasiya Məsləhət Mərkəzinin elmi-tədqiqat institutlarının və regional bölmələrinin nümayəndələri, torpaq mülkiyyətçiləri və fermerlər iştirak edib.
Tədbirdə Quba rayon Ərazi Kənd Təsərrüfatı İdarəsinin rəisi vəzifəsini müvəqqəti icra edən Allahverdi Xudaverdiyev bildirib ki, kənd təsərrüfatında davamlı olaraq mühüm islahatlar həyata keçirilir. Aparılan islahatlar sayəsində ölkədə məhsul istehsalı və ixrac potensialı artıb. Kənd təsərrüfatı bitkilərinin zərərvericilərinə qarşı aparılan mübarizə tədbirlərindən danışan natiq bölgədə keçirilən bu kimi maarifləndirici tədbirlərin aqrar sahənin inkişafına və məhsuldarlığın yüksəldilməsinə öz töhfəsini verəcəyini qeyd edib.
Kənd Təsərrüfatı Nazirliyi yanında Dövlət Fitosanitar Nəzarəti Xidmətinin rəisi Camal Quliyev sahibkarlığın inkişafına verilən dövlət dəstəyi və bu sahədə Kənd Təsərrüfatı Nazirliyi tərəfindən həyata keçirilən tədbirlər, həmçinin ixrac potensialının gücləndirilməsi, idxaldan asılılığın azaldılması, davamlı ərzaq təhlükəsizliyinin təmin edilməsi barədə ətraflı məlumat verib. Çıxışda Dövlət Fitosanitar Nəzarəti Xidmətinin çevik idarəetmə strukturunun formalaşdırılması, zərərli orqanizmlərin diaqnostikası və keyfiyyətə nəzarət üzrə milli laboratoriyaların diaqnostik səviyyəsinin yüksəldilməsi, respublika ərazisində fitosanitar vəziyyətin elmi əsaslarla idarə edilməsi mexanizminin təkmilləşdirilməsi, fitosanitar sabitliyin qorunub saxlanılması, qeyri-dövlət fitosanitar xidməti subyektlərinin inkişafının dəstəklənməsi nəticəsində bitkiçilik məhsullarının istehsalının artırılması, keyfiyyət göstəricilərinin yaxşılaşdırılması, insan sağlamlığına və ətraf mühitə pestisidlərin zərərli təsirinin minimuma endirilməsi istiqamətində ciddi addımlar atıldığı bildirilib.
Qeyd olunub ki, məsələlərə kompleks yanaşılması və istehsal edilən məhsulun keyfiyyətinə nəzarətin gücləndirilməsi sağlam və keyfiyyətli məhsulların istehsalının və ixracının daha da artmasına səbəb olacaq.
Camal Quliyev, həmçinin bölgədə mövcud fitosanitar vəziyyəti ətraflı təhlil edərək, aqrobiosenoza pestisid təzyiqinin azaldılması istiqamətində mövcud problemlərin həlli yollarını göstərib.
Müşavirədə Dövlət Xidmətinin rəis müavini Yaqub Cəfərov “Koliforniya çanaqlı yastıcasının bioekoloji xüsusiyyətləri və ona qarşı səmərəli mübarizənin təşkili”, Dövlət Xidmətinin Respublika Karantin Ekspertiza Mərkəzinin direktorunun müavini Aqil Qasımov “Azərbaycanın meyvə bağlarında rast gəlinən karantin əhəmiyyətli zərərli orqanizmlər”, Dövlət Xidmətinin Respublika Bitki Mühafizəsi Mərkəzinin rəisi Daməd Sultanov isə “Kimyəvi mübarizə tədbirlərinin tətbiqi zamanı qarşıya çıxan problemlər və onların həlli yolları” mövzularında məruzələrlə çıxış ediblər.
Qabaqcıl fermerlər tədbirin yastıcalar əleyhinə mübarizənin təşkilində əhəmiyyətli rol oynayacağını, düzgün tərtib edilən mübarizə sxemləri əsasında dərmanlanmaların sayının azalacağını və səmərəliliyinin artacağını vurğulayıblar.
Tədbirin sonunda iştirakçılara kənd təsərrüfatı bitkilərinin zərərvericiləri barədə bukletlər paylanılıb.
Bölmənin digər xəbərləri
