Şabran-Əmirxanlı-Qazbabalı avtomobil yolunun yenidən qurulması yekunlaşır VİDEO
Bakı, 3 avqust, AZƏRTAC
Prezident İlham Əliyevin tapşırıq və sərəncamlarına uyğun olaraq regionların sosial-iqtisadi inkişafına yönəldilən Dövlət Proqramı çərçivəsində Azərbaycan Avtomobil Yolları Dövlət Agentliyi tərəfindən Şabran rayonunda 26 kilometr uzunluğunda avtomobil yolunun yenidən qurulması işləri yüksək keyfiyyətlə aparılaraq yekunlaşdırılır.
Söhbət Şabran-Əmirxanlı-Qazbabalı avtomobil yolundan gedir. Yol IV texniki dərəcəyə uyğun( 6 m hərəkət hissə, 2x2 m çiyin hissələr) yenidən qurulur.
Azərbaycan Avtomobil Yolları Dövlət Agentliyinin ictimaiyyətlə əlaqələr şöbəsindən AZƏRTAC-a bildiriblər ki, tikinti layihəsinə uyğun olaraq yolun 19.7 kilometrlik hissəsində qabarmış və çökmüş hissələrinin qazılaraq çıxarılması, qazılmış hissələrinin doldurulması, yolun torpaq yatağının qaldırılması və genişləndirilməsi, qruntun hissə-hissə avtoqreyderlə yayılması və lay-lay kipləşdirilməsi işləri aparılıb. Bu işlərin həcmi 90 min kubmetrə yaxındır. Yolun müəyyən hissəsində yolun genişləndirilməsi üçün dağ yamacının kəsilməsi işləri də görülüb.
Torpaq yatağının tikintisi bitən ərazilərdə 200 min kvadratmetr sahəni əhatə edən 20 santimetr qalınlıqda optimal-qırmadaş qarışığı ilə əsasın alt layı, 16 santimetr qalınlıqda qım-çınqıl qarışığından isə əsasın üst layı tikilib.
Şabran-Əmirxanlı-Qazbabalı avtomobil yolunun 6.3 kilometrlik hissəsində isə mövcud asfalt-beton örtüyün frezlənərək profilə salınması, yolun qabarmış və çökmüş hissələrinin qazılaraq çıxarılması və yararlı qruntla yenidən doldurularaq kipləşdirilməsi işləri aparılıb. Qazılaraq doldurulmuş hissələrdə yol əsasının alt və üst layının nəzərdə tutulmuş qarışıqlardan istifadə edilməklə tikintisi aparılıb.
Marşrut boyu 6 ədəd yararsız hala düşmüş müxtəlif diametrli suötürücü boruların yeniləri ilə əvəz edilməsi və zəruri olan yerlərdə yenilərinin tikintisi aparılıb. Bu məqsədlə yolboyu müxtəlif diametrli uzunluğu 239 poqonmetr olan 30 ədəd dəmir-beton boru quraşdırılıb, boru başlıqları dəmir-betonla tikilib və borular izolyasiya olunub.
Daha sonra yolun 5.8-ci kilometrdə Dəvəçi çayı üzərində uzunluğu 21 metr, eni isə 8 metr olan 1 aşırımlı körpünün, 680 metr uzunluğunda dəmir-beton istinad divarlarının, relyefdən asılı olaraq bir-neçə yerdə 3 min poqonmetr uzunluğunda beton küvetlərin tikintisi də layihədə yerinə yetirilməsi vacib olan işlərdəndir.
Tikinti norma və standartlarına uyğun olaraq hazırda yolboyu iri (7 santimetr) və xırda (5 santimetr) dənəli asfalt-beton qarışığından örtüyün alt və üst layının tikintisi işləri aparılır. Asfaltlanma işləri yolun 170 min kvadratmetrdən çox sahəsini əhatə edir.
Layihənin sonuncu mərhələsində isə 12 yerdə avtobus dayanacaqları, həmçinin hərəkətin normal təşkili üçün 85 ədəd yol nişanı, 26 ədəd km göstərici və 1016 ədəd siqnal dirəyi quraşdırılacaq, 77.9 kilometr uzunluğunda xətlənmə işləri aparılacaq.
Qeyd edək ki, 26 kilometr uzunluğunda olan yolun 19.7 kilometrlik hissəsi çınqıl örtüklü idi. Uzun illər istismar olunmasına baxmayaraq yol indiyə qədər yenidən qurulmamışdı. Hətta yolun bəzi hissələrinin IV texniki dərəcəyə uyğunlaşdırılması üçün torpaq yatağının genişləndirilməsinə ehtiyac var idi. Yolun qalan 6.3 kilometrlik hissəsi asfalt-beton örtüklü olmasına baxmayaraq bu hissənin də əsaslı şəkildə təmirinə ehtiyac var idi. Bu üzdən Şabran-Əmirxanlı-Qazbabalı avtomobil yolu 5 yaşayış məntəqəsini əhatə etməklə 6 mindən artıq vətəndaşın rayon mərkəzinə, oradan da respublikanın istənilən nöqtəsinə rahat gediş-gəlişi təmin edəcək, marşrut boyu kənd təsərrüfatı və turizmin daha da inkişaf etməsinə şərait yaradacaq.
Bölmənin digər xəbərləri
