SİYASƏT
İtaliyanın “Askanews” xəbər saytında Azərbaycandakı tolerantlıqla bağlı reportaj yayılıb VİDEO
Bakı, 4 fevral, AZƏRTAC
İtaliyanın “Askanews” xəbər saytında Azərbaycandakı tolerantlıqdan bəhs edən reportaj yayılıb.
AZƏRTAC xəbər verir ki, videoreportajda Bakıda fəaliyyət göstərən dini konfessiyaların təmsilçilərindən müsahibələr də yer alıb.
Qeyd edilir ki, Azərbaycanda müxtəlif dinlərin nümayəndələri tolerantlıq şəraitində heç bir problemlə üzləşmədən yaşayırlar.
Reportajda Bakı Dağ Yəhudiləri dini icmasının rəhbəri Melih Yevdayevin Azərbaycanda müxtəlif dini konfessiyalara mənsub dini icmaların öz dini ayinlərini sərbəst şəkildə yerinə yetirmələri, ümumiyyətlə, tolerantlığın təşviqi istiqamətində görülən işlərlə bağlı fikirləri əksini tapıb. O deyib ki, bir çox ölkələrdən fərqli olaraq Azərbaycanda heç vaxt antisemitizmə rast gəlinməyib.
Reportajda Bakıdakı Heydər məscidində vəhdət namazının qılınması barədə də söhbət açılır.