Bakıda Beynəlxalq TURAZ Akademiyası Konqresi işə başlayıb VİDEO
Bakı, 9 sentyabr, AZƏRTAC
Radio və Televiziya Üst Qurulu (RTÜK), TURAZ Elmi Birliyi, İnönü Universiteti və Azərbaycan Tibb Universitetinin birgə təşkilatçılığı ilə “Zorakılıq və media” mövzusunda məişət zorakılığı, qadınlara və uşaqlara qarşı zorakılıq və istismar məsələlərinin müzakirə edildiyi Beynəlxalq TURAZ Akademiyası Konqresi işə başlayıb.
AZƏRTAC xəbər verir ki, konqresin açılış mərasimində çıxış edən Azərbaycan Tibb Universitetinin rektoru Gəray Gəraybəyli Azərbaycan və Türkiyə arasındakı əlaqələrin yüksək səviyyədə olduğunu və hər iki ölkə arasında müxtəlif sahələrdə əməkdaşlığın olduğunu bildirib. O, ötən il 44 günlük Vətən müharibəsi dövründə Türkiyənin Azərbaycana dəstəyinin, müharibədən sonra isə qazilərin müalicəsində qardaş ölkənin mütəxəssislərinin yaxından iştirak etməsinin qardaşlıq və dostluğun bariz nümunəsi olduğunu bildirib. Tibb Universiteti ilə Türkiyənin müxtəlif universitetləri arasında əməkdaşlıq protokolları imzalandığını, təcrübə mübadiləsinin aparıldığını və hazırda universitetdə 800-ə yaxın Türkiyə vətəndaşının təhsil aldığını qeyd edib.
Rektor bu tədbirin də iki ölkə arasındakı əməkdaşlıq çərçivəsində keçirildiyini qeyd edərək konqresin işinə uğurlar arzulayıb.
Səhiyyə nazirinin müavini Elsevər Ağayev Azərbaycan və Türkiyə arasında digər sahələrdə olduğu kimi səhiyyə sahəsində əməkdaşlıq mövcud olduğunu və hələ müstəqilliyin ilk illərində imzalanan protokollar nəticəsində yüzlərlə azərbaycanlı həkimin qardaş ölkədə təhsil aldığını, bilik və bacarıqlarını artırdığını diqqətə çatdırıb. Nazir müavini həm COVID-19 pandemiyası, həm də Vətən müharibəsi dövründə Türkiyə Cümhuriyyətinin öz dəstəyini əsirgəmədiyini qeyd edib.
Azərbaycan Respublikasının İnsan Hüquqları üzrə müvəkkili (ombudsman) Səbinə Əliyeva bildirib ki, peşəkar araşdırma, jurnalistika olmadan demokratik mühit formalaşa bilməz. O deyib: “Kütləvi informasiya vasitələri şiddət, zorakılıq halları ilə əlaqədar xəbərlər yayımlayarkən diqqətli olmaldırlar. Çünki istəmədən həmin mənfi halların təşviqinə yol verilir. Bu da həmin xəbərləri izləyən uşaqların psixoloji travma alması ilə nəticələnir. Məişət zorakılığı, qadın və uşaqlara qarşı şiddətə dair xəbərlər yayımlanarkən hadisə qurbanlarının şərəf və ləyaqəti mütləq nəzərə alınmalıdır”.
Türkiyə Respublikasının Azərbaycandakı fövqəladə və səlahiyyətli səfiri Cahit Bağçı ölkələrimiz arasındakı münasibətlərdən və iyunun 15-də Azərbaycan və Türkiyə arasında imzalanan Şuşa Bəyannaməsinin əlaqələrin hər sahədə daha da inkişaf etdirilməsi baxımından əhəmiyyətindən bəhs edib. Səfir konqresin mövzusuna diqqət çəkərək vətəndaş cəmiyyətlərdə belə halların yaşandığı üçün təəssüfləndiyini və hər cür şiddətə qarşı olduğunu diqqətə çatdırıb.
RTÜK sədri Ebubekr Şahin və Türkiyə Respublikası Mətbuat Reklam Agentliyinin rəhbəri Rıdvan Duran medianın şiddətə təsiri və zorakılığın media üzərində effektindən bəhs edib və bəzən yayılan xəbərlərə görə xəbərdarlıq və cərimələrin tətbiqindən danışıblar. Bildirilib ki, kütləvi informasiya vasitələrində yayılan bir çox şiddətə meyilli və lazımsız xəbərlər vətəndaşlara təsirsiz ötüşmür. Ona görə də cəza tədbirlərinin bu baxımdan önəmli olduğu qeyd olunub.
Amasya Universitetinin rektoru Süleyman Elmacı, Milli Məclisin deputatı Məlahət İbrahimqızı, TURAZ Elmi Birliyinin İdarə Heyətinin sədri Osman Celbiş, Səhiyyə Nazirliyinin Məhkəmə -Tibbi Ekspertiza və Patoloji Anatomiya Birliyinin direktoru, Tibb Universitetinin patoloji anatomiya kafedrasının müdiri Ədalət Həsənov mediada yayılan xoşagəlməz və zorakılığa meyilli xəbərlərin cəmiyyətə mənfi təsirindən danışıb, konqresin panel sessiyalarının belə halların qarşısının alınması üçün həll yollarının araşdırılması, müzakirəsi istiqamətində əhəmiyyətli rol oynayacağını bildiriblər.
Tədbir panel sessiyalarla davam etdirilir.
Bölmənin digər xəbərləri
