Xaçmaz, 13 dekabr, Elxan Yusifli, AZƏRTAC

Kamran Ömərli son illərin ən istedadlı azərbaycanlı klassik musiqi ifaçılarındandır. Hazırda İspaniyada musiqi fəaliyyəti ilə məşğul olan 27 yaşlı skripkaçı böyük uğurlara imza atıb.

Avropada tanınmağı bacaran gənc istedad AZƏRTAC-ın müxbiri ilə söhbətində uğur hekayəsini bölüşüb, gələcək planlarından danışıb.

Atası mobil telefonu sataraq ona ilk skripkanı alıb

Kamran Ömərli 1994-cü ildə Xaçmaz şəhərində musiqiçi ailəsində anadan olub. Bir müddət sonra ailəsi ilə Bakı şəhərinə köçüb. Uşaqlıqdan musiqiyə böyük marağı olan Kamran 2001-ci ildən Leopold və Mstislav Rostropoviçlər adına 21 nömrəli 11 illik musiqi məktəbində təhsil almağa başlayıb. Məktəbdə skripkada ifa etməyi öyrənən 7 yaşlı balaca istedadın müəllimi professor İlhamə Ağayeva olub.

“Mənim valideynlərim də musiqiçi olub. Amma peşəkar istiqamətdə fəaliyyətlərini davam etməyiblər. İstedadımın olduğunu da əvvəlcə onlar duyublar və məni musiqi məktəbinə göndəriblər. Burada da müəllimim musiqi duyumuma güvənərək skripka ifa etməyi tövsiyə edib. Ümumiyyətlə, valideynlərim həmişə mənə böyük dəstək veriblər. Təsəvvür edin, skripka ifa edəcəyim dəqiqləşəndən sonra atam öz mobil telefonunu 70 ABŞ dollarına sataraq, mənim üçün ilk musiqi alətini alıb”, - deyə Kamran Ömərli bildirir.

Yeniyetmə vunderkind çətin seçim qarşısında

Kamranın istedadı 2006-cı ildən, cəmi 12 yaşı olanda diqqət çəkməyə başlayıb. O, bu yaşda ilk dəfə Q.Qarayev adına Azərbaycan Dövlət Kamera Orkestri ilə birlikdə konsertdə iştirak edib. Həmin il ilk dəfə Respublika müsabiqəsində iştirak edərək II yerə layiq görülüb. Məktəbdə dərslərini də əla qiymətlərlə oxuyan Kamran musiqi sahəsindəki uğurlarından sonra artıq seçim qarşısında qalır.

O deyir: “Anam çox tələbkardır. Mənim musiqi ilə paralel təhsilimi də diqqətdə saxlayırdı. Hətta VII sinfə qədər dərslərimdən 4 alanda narahat olurdu. Amma 14 yaşım olanda müəllimim anamla danışıb bildirdi ki, artıq seçim etmək lazımdır. Hər iki istiqamətdə paralel olaraq yüksək səviyyədə inkişaf etmək, demək olar, mümkün deyil. Çünki skripkanı öyrənmək həddən artıq çox vaxt tələb edir. Belə olan halda mən artıq peşəkar musiqiçi olacağım barədə qərar verdim. Buna stimul verən isə həmin ildə musiqi sahəsində əldə etdiyim uğurlar idi. Artıq özüm də bu sahədə istedadıma çox güvənirdim”.

Kamran bir çox respublika səviyyəli müsabiqədə ardıcıl olaraq müxtəlif nominasiyalar üzrə qalib adını qazanmağı bacarır. Azərbaycanda həmin vaxt keçirilən Gənclər Orkestrinə də cəlb olunur, Rusiya və Niderlandda konsertlərdə iştirak edir.

2010-cu ildə isə xüsusi təklif əsasında Litvada Kaunas Beynəlxalq Musiqi Festivalına qatılır və orada P.İ.Çaykovskinin skripka və orkestr üçün konsertini ifa edir. Litvada böyük sənətkarla qarşılaşan gənc öz ifası barədə onların müsbət rəylərini alır. Elə həmin il Prezident təqaüdünə layiq görülən Kamran Ömərlinin adı həm də Azərbaycanın gənc istedadlarının “Qızıl kitabı”na yazılır.

Klassik musiqinin canlı əfsanəsi ilə görüş həyatında dönüş nöqtəsi oldu

Kamran Ömərli 2011-ci ildə 14-cü Henrik Venyavski adına Beynəlxalq Violin yarışmasına qatılmaq qərarına gəlir. İdmanda olimpiya oyunları ilə müqayisə oluna biləcək çox nüfuzlu bu müsabiqədə çıxış etmək üçün əvvəlcə seçim mərhələsində mübarizə aparmaq lazım idi. Gənc skripkaçının bəxti onda gətirir ki, həmin il seçim turları Tokio (Yaponiya), Kvebek (Kanada) kimi şəhərlərlə yanaşı, həm də Bakıda keçirilirdi. Münsiflər heyətinin rəhbəri isə dünyaşöhrətli skripkaçı, drijor, iki dəfə “Qremmi” mükafatı laureatı Maksim Vengerov idi. Bu mərhələdə seçimlərə qatılan 5 musiqiçi arasında fərqlənən K.Ömərli Beynəlxalq Violin yarışmasında iştirak etmək hüququ qazanır. Sonradan məlum olur ki, 17 yaşlı Kamran nüfuzlu yarımanın ən gənc iştirakçısıdır.

Hələ bu yarışadək M.Vengerovun Bakıda təşkil olunan konsertində onunla birgə ifa edən Kamrana böyük rəğbət bəslənirdi. 14-cü Henrik Venyavski adına Beynəlxalq Violin yarışmasında isə M.Vengerov Kamranı öz müəllimi, klassik musiqinin canlı əfsanələrindən sayılan Zaxar Bronla tanış edir. Məhz bu görüş gənc istedadın həyatında dönüş nöqtəsi olur.

“Zaxar Bron mənim ifamı bəyəndiyi üçün özünün də dərs dediyi Madriddəki musiqi məktəbinə dəvət etdi. Mən Bakıda 11 illik musiqi məktəbini yeni bitirmişdim. Valideynlərimlə məsləhətləşdikdən sonra İspaniyaya yollanmaq qərarına gəldim. 2012-ci ildən Kraliça Sofiya adına Ali Musiqi Akademiyasında Zaxar Bronun sinfində dərs almağa başladım”, - deyə K.Ömərli söyləyir.

Azərbaycanlı gənc musiqiçi Kraliça Sofiya adına Ali Musiqi Akademiyasında 8 il ərzində bakalavr və magistr dərəcələrində təhsil alıb. 2020-ci ildə ali musiqi məktəbini bitirən K.Ömərli bu illər ərzində mühüm nailiyyətlər qazanır.

Kamran 2014-cü ildə “Ən yaxşı simli kvartet” nominasiyasının, 2016-cı ildə isə “Ən yaxşı skripkaçı” nominasiyasının qalibi olur.

2015-ci ildə Bolqarıstanın Sofiya şəhərində keçirilən “Gənc İstedadlar” Beynəlxalq Violin yarışmasının, üç il sonra isə “Arnuero Beynəlxalq Kamera Musiqisi Yarışması”nın qalibi adını qazanır. Kamran ən yaxşı trio və yarışmanın ən yaxşı skripkaçısı nominasiyası üzrə ilk dəfə təqdim olunan, dahi ispan skripkaçısı və bəstəkarının adına təsis edilən “Jesús de Monasterio” mükafatına da layiq görülür.

Bu nailiyyətlərinə görə İspaniya Kral ailəsinin üzvü, Kraliça Dona Sofiya üç il ərzində azərbaycanlı musiqiçini 3 dəfə fəxri diplomla təbrik edir.

2016-cı ildən başlayaraq K.Ömərli beş il Kraliça Sofiya adına Ali Musiqi Akademiyasının tərkibindəki Freixenet orkestrinin konsertmeysteri kimi fəaliyyət göstərib. Bu illər ərzində isə İspaniya dövlət radio və televiziyası üçün bir neçə dəfə canlı konsertlə çıxış edib.

Kamran 2021-ci Ali Musiqi Məktəbini bitirdikdən sonra Basklar Ölkəsi Dövlət Simfonik Orkestrinin üzvü seçilməyi bacarıb. Hazırda bu orkestrdə skripkaçı kimi fəaliyyət göstərən həmyerlimiz İspaniyanın bəzi əyalətlərində konsertlərlə çıxış edir. 2018-ci ildən professor adını qazanıb, həm də pedaqoji fəaliyyətlə məşğuldur. Azərbaycanda Qəbələ Musiqi Festivalında da konsertlə çıxış edib.

“Mən burada Azərbaycan səfirliyinin təşkilatçılığı ilə keçirilən tədbirlərə məmnuniyyətlə iştirak edirəm. Klassik musiqimizi burada tanıtmaq üçün bir çox planlarım var. Gələn il Azərbaycan klassik musiqi sənətinin görkəmli nümayəndəsi Fikrət Əmirovun 100 illik yubileyi qeyd ediləcək. Bu münasibətlə İspaniyada konsert təşkil etmək arzusundayam. Bundan başqa, 2022-ci ildə Azərbaycan Bəstəkarlar İttifaqının sədri, Xalq artisti Firəngiz Əlizadənin də 75 illik yubileyidir. Çox istəyirəm ki, bu münasibətlə təmsil olunduğum orkestrlə konsert təqdim edək. Çünki Basklar Ölkəsi Dövlət Simfonik Orkestri daim bu cür təşəbbüslərlə çıxış edir. Bizim də bu fürsətdən yararlanmaq imkanımız var. Artıq Firəngiz xanımla əlaqə saxlamışam. Bu təklifim müsbət qarşılandı və Firəngiz xanım əsərlərini bizə təqdim edib. Burada Azərbaycanı klassik musiqimizlə yüksək səviyyədə təmsil və təbliğ etmək istəyirəm”,-deyə K.Ömərli söyləyib.

“İstəyirəm ki, ifa etdiyim musiqilər insanlarda xoş duyğular yaratsın”

Kamran Ömərli hazırda İspaniyanın San-Sebastian şəhərində yaşayır. Ailəlidir, 7 yaşlı qız və 5 yaşlı oğlan övladı var.

Nadir hallarda boş vaxtının olduğunu söyləyən Kamran deyir: “İmkan olan kimi, təbiət qoynunda gəzməyi, kitab oxumağı sevirəm. Futbola baxıram, “Real Madrid” klubuna azarkeşlik edirəm. “Atletiko Madrid” və “Qarabağ” komandaları arasındakı matçı stadionda izləmişəm. Amma əlbəttə əsas zamanımı musiqiyə ayırıram. Mənə verilən bu istedadı ən yüksək səviyyəyə çatdırsam, xoşbəxt olaram. Ən əsası insanlıq üçün faydalı olmaq istəyirəm. Musiqi insanın mənəviyyatını qidalandırır. Təəssüf ki, son zamanlar klassik musiqiyə maraq azalır. Konsertlərə gələnlərin arasında gənclər azdır. İstərdim ki, modern bir formul ilə yeni nəsildə klassik musiqiyə maraq oyatmaq mümkün olsun. Çox çətin missiyadır. Həmişə istəmişəm ki, ifa etdiyim musiqilər insanlarda xoş duyğular yaratsın”.