20 Yanvar Azərbaycan xalqının azadlıq mübarizəsinin parlaq səhifəsidir
Ağcabədi, 18 yanvar, AZƏRTAC
Ağcabədi rayon Heydər Əliyev Mərkəzində keçirilən “20 Yanvar - Tariximizin şanlı səhifəsi” adlı tədbirin iştirakçıları əvvəlcə “Qanlı Yanvar” sərgisi ilə tanış olublar.
AZƏRTAC xəbər verir ki, tədbir şəhidlərimizin xatirəsinin bir dəqiqəlik sükutla yad edilməsi ilə başlayıb.
Heydər Əliyev Mərkəzinin direktoru Məhsəti Musa 20 Yanvar faciəsi və Azərbaycan xalqının azadlıq uğrunda apardığı mübarizədən danışıb. Bildirib ki, ölkəsinin ərazi bütövlüyü uğrunda mübarizəyə qalxmış dinc əhaliyə divan tutulması, yüzlərlə günahsız insanın qətlə yetirilməsi totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdi. Faciə zamanı xalqının səsinə hər kəsdən əvvəl səs verən Heydər Əliyev oldu. Ümummilli Liderimiz hadisələrdən dərhal sonra, 1990-cı il yanvarın 21-də ölkəmizin Moskvadakı daimi nümayəndəliyinə gəldi, qətliama etirazını bildirdi, faciəni törədənləri kəskin ittiham edən bəyanatla çıxış etdi. Ulu Öndərin 1993-cü ildə hakimiyyətə qayıdışından sonra qanlı Yanvar faciəsinə dövlət səviyyəsində siyasi-hüquqi qiymət verildi.
Sonra Heydər Əliyev Mərkəzinin baş fond mühafizi Leyla Səfərovanın “Qəhrəmanlıq salnaməsi” adlı məruzəsi dinlənilib.
Yeni Azərbaycan Partiyası rayon təşkilatının aparat rəhbəri Nazim Bünyadov, rayon icra hakimiyyəti ictimai-siyasi və humanitar məsələlər şöbəsinin baş məsləhətçisi Ceyhun Məmmədov və başqaları çıxış edərək, 1990-cı il yanvarın 20-də törədilmiş faciədən, Vətənin azadlığı və ərazi bütövlüyü uğrunda canlarından keçən həmvətənlərimizin mübarizliyindən danışıb, qanlı hadisəni Azərbaycan xalqının azadlıq mübarizəsinin və qəhrəmanlıq salnaməsinin parlaq səhifəsi adlandırıblar.
Çıxışlardan sonra Mərkəzdə fəaliyyət göstərən “Həvəskar aktyorluq və bədii qiraət” kursunun üzvlərinin ifasında ədəbi-bədii kompozisiya və 20 Yanvar hadisələrini özündə əks etdirən sənədli film nümayiş etdirilib.
Bölmənin digər xəbərləri
