20 Yanvar faciəsi xalqımızın mübarizə əzmini qıra bilməyib
Bakı, 18 yanvar, AZƏRTAC
Azərbaycan Milli Elmlər Akademiyasının (AMEA) əsas binasında Gənc Alim və Mütəxəssislər Şurasının (GAMŞ) təşkilatçılığı ilə 20 Yanvar faciəsinin 28-ci ildönümünə həsr olunan anma tədbiri keçirilib.
AMEA-dan AZƏRTAC-a bildirilib ki, tədbir çərçivəsində 20 Yanvar Fondunun sədri Şövqi Bünyadovun Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə çap edilmiş “20 Yanvar hadisəsi və aprel döyüşlərinin milli ruhumuzun inkişafındakı rolu” kitabının təqdimatı olub.
Tədbirdə GAMŞ-ın sədri, fizika üzrə fəlsəfə doktoru, dosent Famin Salmanov 20 Yanvar faciəsinin Azərbaycan xalqının azadlıq və müstəqilliklə bağlı milli təfəkkürünün inkişafındakı rolundan danışıb. O, xalqın demokratiya və milli azadlıq uğrunda mübarizəsini boğmaq məqsədilə sovet rəhbərliyi tərəfindən Bakıya qoşun yeridildiyini və nəticədə 147 nəfərin öldürüldüyünü, 744 nəfərin yaralandığını, 841 nəfərin qanunsuz həbs olunduğunu vurğulayıb. Azərbaycanın geosiyasi cəhətdən mürəkkəb coğrafi regionda yerləşdiyini deyən F.Salmanov baş verən hadisələrin xalqın mübarizə əzmini qıra bilmədiyini, milli iradə sayəsində ölkəmizin yenidən müstəqillik əldə etdiyini bildirib.
Diqqətə çatdırılıb ki, bu qanlı hadisəyə ilk hüquqi-siyasi qiymət ümummilli lider Heydər Əliyev tərəfindən verilib. Belə ki, Ulu Öndər 1990-cı il yanvarın 21-də Azərbaycanın Moskvadakı daimi nümayəndəliyində keçirdiyi mətbuat konfransında faciəni törədənləri kəskin tənqid edib.
GAMŞ sədri bu gün çağdaş Azərbaycanın siyasi, iqtisadi və hərbi cəhətdən önəmli gücə malik olduğunu bildirib. Vurğulanıb ki, 2016-cı ilin aprel döyüşlərində Ermənistan ordusu üzərində əldə edilən qələbə bunun bariz nümunəsidir.
Müəllifi olduğu kitab barədə məlumat verən Ş.Bünyadov nəşrin ən yeni dövr Azərbaycan tarixinin iki önəmli hadisəsinə - 20 Yanvar faciəsinə və 2016-cı il aprel döyüşlərinin təhlilinə həsr edilib. Kitabda iki hadisə arasında müqayisələr aparılıb, lider-millət vəhdətinin əhəmiyyəti araşdırılıb. .
Sonra AMEA-nın Şərqşünaslıq İnstitutunun elmi işçisi, tarix üzrə fəlsəfə doktoru, dosent Sübhan Talıblının, Azərbaycan Respublikasının Prezidenti yanında Dövlət İdarəçilik Akademiyasının doktorantı Məzahir Əfəndiyevin və başqalarının 20 Yanvar faciəsi ilə bağlı məruzələri dinlənilib.
Bölmənin digər xəbərləri
