AZƏRTAC-ın təcrübə proqramında iştirak edən tələbələrə sertifikatlar təqdim olunub VİDEO
Bakı, 17 oktyabr, AZƏRTAC
Azərbaycan Dövlət İnformasiya Agentliyində (AZƏRTAC) üçaylıq təcrübə proqramında iştirak edən tələbələrə oktyabrın 17-də sertifikatlar təqdim olunub.
Bundan başqa, Bakı Dövlət Universitetinin (BDU) Jurnalistika fakültəsinin bir qrup 1-ci kurs tələbəsi AZƏRTAC-ın yeni binasında yaradılan şəraitlə tanış olub, muzeyə və Ümummilli Lider Heydər Əliyevin, Prezident İlham Əliyevin və birinci xanım Mehriban Əliyevanın genişmiqyaslı fəaliyyətini əks etdirən fotolara baxıblar.
AZƏRTAC-ın İdarə Heyətinin sədri Vüqar Əliyev tələbələrlə görüşdə Agentliyin tarixi və fəaliyyət istiqamətləri barədə məlumat verib.
Bildirilib ki, AZƏRTAC ictimai-siyasi və iqtisadi mövzularda, habelə elm, təhsil, mədəniyyət, səhiyyə, idman, ətraf mühit və digər sahələrlə bağlı 8 dildə - Azərbaycan, ingilis, rus, fransız, alman, ərəb, Çin və ispan dillərində fasiləsiz olaraq informasiya yayır. Bir əsrdən artıq yaşı olan Agentlik zəngin jurnalistika ənənələrinə və təcrübəsinə malikdir.
İkinci Qarabağ müharibəsində qazanılan tarixi Qələbəmizdən danışan İdarə Heyətinin sədri Prezident, Müzəffər Ali Baş Komandan İlham Əliyevin rəhbərliyi ilə şanlı Ordumuzun xalqımızın 30 illik həsrətinə 44 gündə son qoyduğunu bildirib. Qeyd edilib ki, bu tarixi Zəfərin gələcək nəsillərə daha geniş və dolğun şəkildə çatdırılması, ümumilikdə ölkəmizin haqq işinin müdafiəsi və təbliği istiqamətində jurnalistlərin üzərinə böyük vəzifə düşür. Diqqətə çatdırılıb ki, indiki zamanda medianın həm dəqiq, həm qərəzsiz, həm də operativ olması üçün daha çox səy göstərilməlidir.
Vurğulanıb ki, AZƏRTAC ölkə və xarici media qurumları üçün Azərbaycan haqqında rəsmi xəbərlərin ilkin mənbəyi olmaqla yanaşı, həm də geniş ictimaiyyət üçün etibarlı informasiya resursudur. Gün ərzində Agentliyin xəbər lentində 8 dildə 500-dən çox informasiya, foto və videomaterial yerləşdirilir, ölkəmizin həyatında baş verən əsas hadisələr barədə məlumatlar xarici medianın xəbər bloklarında da əks olunur.
Görüşdə gənc kadrların yetişdirilməsinə xüsusi önəm verildiyi vurğulanıb. Jurnalistikanın yeni texnologiyalar və sosial medianın təsiri altında dəyişdiyini deyən Vüqar Əliyev informasiyanın cəmiyyətə çatdırılmasında da yeni formaların yarandığını bildirib.
Sonda tələbələrə sertifikatları təqdim edən İdarə Heyətinin sədri onlara təhsildə və gələcək fəaliyyətlərində uğurlar diləyib. Görüşdə BDU-nun Jurnalistika fakültəsinin dekan müavini Samir Mirzəyev iştirak edib.
Bölmənin digər xəbərləri
