AZƏRTAC-ın kollektivi Fəxri xiyabanda Ulu Öndərin məzarını ziyarət edib VİDEO
Bakı, 12 dekabr, AZƏRTAC
Dekabrın 12-si Ulu Öndər Heydər Əliyevin anım günüdür. Hər il olduğu kimi, bu il də həmin gün Azərbaycan xalqı öz dahi oğlunun xatirəsini dərin ehtiramla anır. İnsanlar axın-axın Fəxri xiyabana gələrək Ümummilli Liderin məzarı üzərinə güllər düzür, Vətən və xalq qarşısındakı xidmətlərini minnətdarlıq duyğuları ilə xatırlayırlar.
AZƏRTAC-ın kollektivi də anım günündə Ümummilli Lider Heydər Əliyevin Fəxri xiyabandakı məzarını ziyarət edib, önünə tər güllər qoyub.
Ulu Öndərin ömür-gün yoldaşı, görkəmli oftalmoloq-alim, akademik Zərifə xanım Əliyevanın da məzarı ziyarət olunub, xatirəsi ehtiramla anılıb.
Agentliyin inzibati binasında Ümummilli Lider Heydər Əliyevin anım mərasimi də keçirilib. Əvvəlcə Ulu Öndərin abidəsi önünə gül dəstələri düzülüb. Sonra Ulu Öndərin və şəhidlərimizin xatirəsi bir dəqiqəlik sükutla yad edilib.
AZƏRTAC-ın İdarə Heyətinin sədri Vüqar Əliyev anım mərasimində çıxış edərək Ümummilli Lider Heydər Əliyevin Vətən və xalq qarşısında tarixi və misilsiz xidmətlərindən danışaraq deyib: “Ulu Öndərin Azərbaycana rəhbərlik etdiyi dövrlər milli tariximizə dirçəliş, intibah və inkişaf illəri kimi yazılıb. Ümummilli Lider çətin dövrlərdə həmişə xalqının yanında olub. Xalqın təkidli tələbi ilə 1993-cü ilin iyununda ölkəmizdə yenidən siyasi hakimiyyətə qayıdan Ümummilli Lider Heydər Əliyev xilaskarlıq missiyasını uğurla yerinə yetirib. 1993-2003-cü illərdə Azərbaycanda milli dövlət quruculuğu prosesi əzmlə həyata keçirilib, nizami ordu yaradılıb, ölkəmiz dinamik inkişaf yoluna qədəm qoyub. Məhz Ulu Öndərin müəyyənləşdirdiyi siyasi kurs və cənab Prezident İlham Əliyevin mükəmməl idarəçiliyi sayəsində Azərbaycanın suverenliyi tam bərpa olunub”.
İdarə Heyətinin sədri vurğulayıb ki, Ulu Öndər Heydər Əliyevin uzaqgörən siyasətini uğurla davam etdirən Prezident İlham Əliyev nəhəng transmilli layihələrin təşəbbüskarı olan Azərbaycanı dünyada söz və nüfuz sahibinə çevirib. Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində ordumuz düşməni darmadağın edərək torpaqlarımızın 30 illik işğalına son qoyub.
Vüqar Əliyev Ulu Öndərin AZƏRTAC-a göstərdiyi diqqət və qayğıdan, müasir dövrdə agentliyin qarşısında duran vəzifələrdən də bəhs edib. Diqqətə çatdırıb ki, fəaliyyətində yeni keyfiyyət mərhələsinə qədəm qoyan agentliyin dünya informasiya məkanında layiqli yer tutması, etimadı doğrultması, işini zamanın çağırışlarına uyğun qurması üçün kollektiv bütün qüvvə və imkanlarını səfərbər etməlidir.
Ulu Öndərin “İndi baxın bizim dilimiz nə qədər zəngindir, nə qədər məlahətlidir, nə qədər şirindir və bütün fikirləri ifadə etməsi üçün nə qədər söz ehtiyatlarına malikdir” sitatını xatırladan V.Əliyev deyib ki, hər bir azərbaycanlı, o cümlədən jurnalistlər ana dilimizin qayğısına qalmağa borcludur. Bu mənada, agentliyimizin jurnalistlərinin üzərinə daha böyük məsuliyyət düşür.
Bölmənin digər xəbərləri
