Kiyevdə Ulu Öndər Heydər Əliyevin anadan olmasının 101-ci ildönümünə həsr olunmuş müsabiqənin qalibləri mükafatlandırılıb VİDEO
Kiyev, 25 iyun, AZƏRTAC
Kiyevdə Ulu Öndər Heydər Əliyevin anadan olmasının 101-ci ildönümü münasibətilə Azərbaycan Respublikasının Ukraynadakı səfirliyinin Ukrayna-Türk Mərkəzi ilə birgə təşkil etdiyi “Ukrayna-Azərbaycan münasibətlərinin inkişafında Azərbaycan xalqının Ümummilli Lideri Heydər Əliyevin rolu” mövzusunda inşa müsabiqəsinə yekun vurulub.
AZƏRTAC xəbər verir ki, müsabiqə çərçivəsində Ukraynanın müxtəlif yerlərindən - Kiyev, Xarkov, Dnepr, Lvov, Xerson, Ternopol, Xmelnitski və digər şəhərlərdən olan ukraynalı gənclər öz esselərini səfirliyə göndəriblər. Müsabiqənin yekunlarına dair seçilən üç qalibə və on finalçıya Azərbaycan səfirinin diplomları və hədiyyələr təqdim olunub.
Qaliblərə və finalçılara müraciət edən ölkəmizin Ukraynadakı səfiri Seymur Mərdəliyev iki ölkə arasında ictimai və mədəni diplomatiyanın inkişafında gənclərin fəal iştirakının, o cümlədən ukraynalı gənclərin Azərbaycan xalqının mədəniyyəti, tarixi, ədəbiyyatı və dilini öyrənməsinin vacibliyini qeyd edib. “Mən iştirakçıların əsərlərini maraqla və təkrar oxudum, şadam ki, siz ölkələrimiz arasında əlaqələrin müxtəlif sahələrini, onların inkişafında Heydər Əliyevin rolunu öyrənmisiniz. Azərbaycanla bağlı layihələrdə iştirak etmək üçün göstərdiyiniz səylərdə sizi dəstəkləməyə davam etməkdən şad olarıq. Heydər Əliyev ölkələrimiz arasında strateji tərəfdaşlığın əsasını qoydu, ikitərəfli münasibətlərin müxtəlif sahələrində yüksək nəticələr əldə etmək üçün çox böyük səy göstərdi. Bu kurs Azərbaycan Prezidenti İlham Əliyev tərəfindən uğurla davam etdirilir”, -deyə səfir bildirib.
Ukrayna parlamentinin deputatı, Ukrayna-Türk Mərkəzinin həmtəsisçisi Sergey Naqornyak Azərbaycanla bağlı layihələrdə iştirak edən ukraynalı gənclərə dəstək olduqlarına görə səfirə və səfirliyin əməkdaşlarına təşəkkür edib. O qeyd edib: “Azərbaycan Ukraynanın çox mühüm strateji tərəfdaşıdır və buna görə də biz ikitərəfli münasibətlərin inkişafına ixtisaslaşmış mütəxəssisləri cəlb etməliyik ki, onlar əməkdaşlığımızı yeni ideyalarla zənginləşdirə bilsinlər. Gənclər mədəni və ictimai diplomatiya sahəsində yeni layihələr üçün çox fəal, yaradıcı resursdur”.
İnşa müsabiqəsinin qalibləri Sivak Danılo (Kiyev Mədəniyyət Universiteti), Həmidulla Əliyev (Taras Şevçenko adına Kiyev Milli Universitetinin Beynəlxalq Əlaqələr İnstitutu), Tatyana Nikora (“Ostroq Akademiyası” Milli Universiteti) olublar.
Finalçılar Darya Ponomarenko (Kiyev Milli Mədəniyyət və İncəsənət Universiteti), Elçin Sadayev (İ. Karpenko-Karı adına Kiyev Milli Teatr, Kino və Televiziya Universiteti), Ruslan Saloqub (Xarkov Milli Daxili İşlər Universiteti), Polina Pyatnitsa ( Milli Texniki Universiteti - “Dneprovskaya Politexnik”), Anton Oqey (Boris Qrinçenko adına Kiyev Metropolitan Universiteti), Anastasiya Levko (Qərbi Ukrayna Milli Universitetinin Transkarpatiya Tədris və Elm İnstitutu), Yuliya Bayovskaya (“Lvov Politexnik” Milli Universiteti), Dmitri Diyançuk, Darına Semençuk, Oleq Bardey (Xmelnitski Humanitar-Pedaqoji Akademiyası) olublar. Səfir, həmçinin Azərbaycan tarixinin, mədəniyyətinin və incəsənətinin Ukraynada təbliğində şəxsi xidmətlərinə görə Ukrayna-Türk Mərkəzinin həmtəsisçisi Marına Qonçaruku mükafatlandırıb.
Müsabiqənin qalibi Tatyana Nikora bildirib: “Mən cənab səfirə ukraynalı gənclərə verdiyi dəstəyə, Azərbaycan haqqında daha çox məlumat əldə etməyimiz üçün keçirdiyi mühazirələrə və onlayn görüşlərə görə çox minnətdaram. Düşünürəm ki, Seymur Mərdəliyevin onlayn mühazirələrində iştirak etməyim sayəsində inşanı uğurla yaza bildim. Mən də Azərbaycan dilini öyrənmək və Azərbaycanı özüm üçün daha çox kəşf etmək istəyirəm”.
Səfir, həmçinin ukraynalı gənclər üçün proqramlar və yaradılacaq imkanlar haqqında məlumat verib, tələbə və müəllimlərin suallarını cavablandırıb.
Tədbirdə Xmelnitski adına Humanitar Pedaqoji Akademiyasının rektoru İnna Şorobura, Xmelnitski adına Humanitar Pedaqoji Akademiyasının müəllimi Natalya Protsyuk, Qərbi Ukrayna Milli Universitetinin Zakarpatiya Tədris və Elm İnstitutunun direktoru Edita Qrabar iştirak ediblər.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
