Yevlax, 31 yanvar, Rəşad Türkoğlu, AZƏRTAC

Ölkə ərazisində ekoloji tarazlığın qorunması, meşə sahələrinin genişləndirilməsi və yaşıllaşdırma tədbirləri çərçivəsində genişmiqyaslı meşəbərpa işləri aparılır.

AZƏRTAC xəbər verir ki, bu gün Yevlax və Ağdaş rayonlarının meşə fondu torpaqlarında ağacəkmə aksiyaları təşkil olunub..

Yevlax rayonunda əvvəllər zərərvericilər və xəstəliklər səbəbindən məhv olmuş ərazilərdə Şərq çinarı və Eldar şamı ağacları əkilib. Eyni zamanda, Ağdaş rayonunun meşə fondu torpaqlarında Şərq çinarı ağacları əkilərək, ərazidə ekosistemin bərpasına töhfə verilib.

13 saylı Regional Meşə Təsərrüfatı Mərkəzinin direktoru Məzahir Qasımov müsahibəsində bildirib ki, görülən işlər çərçivəsində 3,5 hektar ərazi qanunsuz zəbtolunmadan azad edilib və həmin sahədə 2300 ədəd Şərq çinarı əkilib. Bundan əlavə, xəstəlik yayılan 44 hektarlıq ərazidə ümumilikdə 22 min ağac əkilib. O, həmçinin qeyd edib ki, yaxın gələcəkdə daha 16 hektarlıq sahədə də ağacəkmə işlərinin aparılması planlaşdırılır.

Ekologiya və təbii sərvətlər naziri Muxtar Babayev AZƏRTAC-a açıqlamasında bildirib ki, bu cür hallara qarşı müxtəlif tədbirlər həyata keçirilir, dezinfeksiya işləri aparılır və xəstə ağacların sağlam əkinlərlə əvəzlənməsi istiqamətində addımlar atılır: “Ağacların zərərverici və xəstəliklərə yoluxaraq qurumasının əsas səbəblərindən biri iqlim dəyişmələridir. Qlobal istiləşmə xəstəliklərin əmələ gəlməsinə təsir edir. Bundan əlavə, ağaclar yaşından, su azlığından və digər səbəblərdən də xəstələnə və quruya bilər. Aşkarladığımız hallara qarşı mübarizə aparır, dezinfeksiya işləri görür, ağacların qorunması üçün tədbirlər həyata keçiririk. Amma elə xəstəliklər var ki, onlar haqqında məlumatlar çox deyil və hazırda öyrənilir. Təəssüf ki, bu cür xəstəliklər çox ərazidə var. İnanıram ki, alimlər bu xəstəliklərə qarşı da mübarizə üsulunu tapacaqlar. Bizim işimiz həmin xəstəliklərə yoluxaraq quruyan ağacların yeniləri ilə - daha dayanıqlı Eldar şamı, Xan çinarı kimi növlərlə əvəz olunmasından ibarətdir. Hazırda müxtəlif rayonlarda bu istiqamətdə işlər davam etdirilir”.

Ölkə ərazisində meşə fondunun bərpası və yeni yaşıllıq sahələrinin yaradılması istiqamətində işlər növbəti günlərdə də davam etdiriləcək. Planlaşdırılan yeni aksiyalar çərçivəsində müxtəlif bölgələrdə minlərlə ağac əkiləcək, ekosistemin sağlamlaşdırılması üçün tədbirlər görüləcək. Mütəxəssislər hesab edirlər ki, ağacların zərərverici və xəstəliklərə yoluxaraq qurumasının əsas səbəblərindən biri iqlim dəyişmələri və qlobal istiləşmədir. Temperaturun yüksəlməsi bəzi ağac növlərinin xəstəliklərə daha həssas olmasına səbəb olur. Bundan əlavə, su çatışmazlığı, torpağın keyfiyyətinin pisləşməsi və ekoloji faktorlar da ağacların xəstələnməsinə və qurumasına gətirib çıxarır.