Rusiya nazir müavini: Azərbaycanın güclü idman irsi, gözəl idman qurğuları var VİDEO
Gəncə, 29 sentyabr, Vüsalə Cənnətova, AZƏRTAC
Gəncədə keçirilən III MDB Oyunlarının rəsmi açılış mərasimində iştirak etməkdən zövq aldıq. Biz texnoloji inkişaf, gənclik və mədəni irsin elementlərini gördük. Tam əminliklə deyə bilərəm ki, mərasim uğurla keçdi. Rusiya burada ən çox idmançı və nümayəndəsi olan ölkələrdəndir. İdmançılarımız güclü və istəkli rəqibləri görməyə sevinirlər. Bu, onlar üçün böyük təcrübə olacaq.
AZƏRTAC-ın bölgə müxbirinin verdiyi məlumata görə, bunu Gəncədə keçirilən MDB-yə üzv dövlətlərin Bədən Tərbiyəsi və İdman Şurasının iclasından sonra jurnalistlərə açıqlamasında Rusiya idman nazirinin müavini Aleksey Morozov deyib.
Rusiyalı nazir müavini III MDB Oyunlarının keçirildiyi bütün şəhərləri ziyarət etmək istədiklərini bildirib. Vurğulayıb ki, oyunlara qatılan idmançılar Azərbaycanı coğrafi və mədəni tərəfdən kəşf edəcək, yeni əlaqələr, dostluqlar quracaqlar.
“Bu çox vacibdir, mədəni mübadilədir. Azərbaycanın güclü idman irsi, gözəl idman qurğuları var. Oyunlardan sonra da bu infrastruktur qalacaq. Təbii ki, burada yarışları idarə edən mütəxəssislərin, hakimlərin də təcrübəsi artacaq”, - deyən Aleksey Morozov növbəti MDB Oyunlarının Rusiyada keçirilmə ehtimalı ilə bağlı sualı da cavablayıb: “Bu gün bu məsələ müzakirə olunub. Dünən də rəsmi və qeyri-rəsmi olaraq bütün bunları müzakirə etdik. Bəzi variantlar artıq hazırdır. Düşünürəm ki, bunu hamı ilə müzakirə edəcəyik. Rusiya Federasiyası hər zaman kömək əlini uzatmağa hazırdır. Oyunları özümüz keçirməkdən məmnun olarıq. Növbəti görüşdə IV MDB Oyunlarının keçiriləcəyi yeri rəsmən təsdiq edəcəyik”.
Bölmənin digər xəbərləri
