Biləsuvarda ilk dəfə olaraq pambıq sahələrinin becərilməsində dronlardan istifadəyə başlanılıb FOTO VİDEO
Biləsuvar, 10 oktyabr, İlkin Adıyev, AZƏRTAC
Yeni texnologiyaların inkişafı artıq bir sıra sahələrdə ənənəvi texnikaların istifadəsini minimuma endirir. Biləsuvarda ilk dəfə olaraq pambıq sahələrinin becərilməsində təsərrüfat dronlarından istifadəyə başlanılıb. Bu, həm xərcləri azaltmaqla sahəyə ağır texnikalar tərəfindən vurulan ziyanın qarşısını alır, həm də işin daha sürətli və dəqiq icrasına imkan verir.
AZƏRTAC-ın bölgə müxbiri xəbər verir ki, bu il Biləsuvar rayonunda pambıqçılıqda innovativ yanaşma tətbiq olunur. Fermerlər sahələrdə pambıq becərilməsi üçün ənənəvi üsullardan deyil, müasir dron texnologiyasından istifadə edirlər. Dronlarla dərmanlama həm daha sürətli, həm də daha səmərəli nəticə verir. Bu üsul vasitəsilə dərmanlama zamanı kimyəvi maddələr torpağa bərabər paylanır, insan əməyinə olan ehtiyac isə xeyli azalır.
“Yaşıl ada” aqroparkının icraçı direktoru Cahangir Səfərov deyir ki, əvvəlki illərdə texnikalarla becərmə işləri aparılarkən həm xərclər çox olurdu, həm də pambıq kolları texnikanın təkərləri altında qalaraq hektara 2 sentnerədək məhsul itkisinə səbəb olurdu. Dron texnologiyaları isə bu xərcləri tamamilə aradan qaldırıb.
“Biləsuvarda bu il pambıqçılıq mövsümünə xüsusi yanaşma ilə başladıq. Əvvəllər pambığın əkini vaxtı yağışlı havalarda sahələrdə su yığılırdı, torpaq palçıqlı olurdu, texnikalar isə bu şəraitdə sahələrə girə bilmirdi. Bu, həm dərmanlama, həm də aqrotexniki tədbirlərin vaxtında aparılmasına ciddi maneə yaradırdı. Lakin bu il biz problemi demək olar ki, tam aradan qaldırdıq. Səbəb isə müasir dron texnologiyasından istifadə etməyimizdir. Dronlar vasitəsilə sahələrə dərmanlama daha tez, dəqiq və bərabər şəkildə aparılır. Artıq texnikanın palçığa batması, ya da sahəyə girməməsi kimi hallar yoxdur. Bundan başqa, dronlardan istifadə həm yanacaq sərfiyyatını azaldır, həm də insan əməyinə olan ehtiyacı minimuma endirir. Ən vacibi isə dərmanlama zamanı pambıq sahələrinin bütün hissələrinə eyni miqdarda dərman düşür, bu da zərərvericilərin qarşısının daha effektiv alınmasına şərait yaradır. Bu texnologiyanın tətbiqi sayəsində biz həm vaxt qazanır, həm də məhsuldarlığı artırırıq. Builki nəticələr göstərir ki, Biləsuvarda pambıqçılıq müasir texnologiyalar sayəsində yeni mərhələyə qədəm qoyub” , - deyə aqroparkın icraçı direktoru bildirir.
Sahələrin koordinatları, uçuş hündürlüyü, hətta pestisidlərin çiləmə sürəti öncədən dronun yaddaşına yazılır. Operator sadəcə dronu havaya qaldırmaqla prosesi avtomatik rejimdə həyata keçirir. 40 litrə qədər maye daşımaq gücünə malik bu dronlar dərmanlama zamanı mayenin bitdiyi nöqtəni yadda saxlayır və yenidən doldurulduqdan sonra işi qaldığı yerdən davam etdirir.
“Hər hansı təhlükə olarsa, məsələn ağaclıq və ya elektrik naqilləri olan əraziyə yaxınlaşanda videoqeydiyyat aparırıq ki, problem yaranarsa səbəbi müəyyən etmək mümkün olsun. Həmçinin bitki çıxmayan boşluqları qeydə alırıq və baş aqronoma təqdim edirik. Bu da sahənin sentner və hektar ölçüsünü daha dəqiq müəyyənləşdirməyə kömək edir” , - deyə dron operatoru Rəşid İmanzadə bildirir.
Hazırda hər bir dron gün ərzində 50 hektara yaxın sahədə becərmə işi icra etmək gücündədir. Qeyd edək ki, bu dronlardan sahələrin gübrələnməsi prosesində də istifadə oluna bilər.
Bölmənin digər xəbərləri
