“Qarabağın dirçəlişi müasir kommunikasiya və hekayəçilik müstəvisində” mövzusunda panel görüş təşkil olunub VİDEO
Bakı, 15 oktyabr, AZƏRTAC
Oktyabrın 15-də Qarabağ Dirçəliş Fondunun təşkilatçılığı ilə “Qarabağın dirçəlişi müasir kommunikasiya və hekayəçilik müstəvisində” mövzusunda panel görüş keçirilib.
AZƏRTAC xəbər verir ki, tədbirdə Qarabağ Dirçəliş Fondunun İdarə Heyətinin sədri Rəhman Hacıyev çıxış edərək panel müzakirəsinin əhəmiyyətindən danışıb. O bildirib ki, belə tədbirlər Azərbaycanın işğaldan azad olunmuş ərazilərində aparılan bərpa və inkişaf işlərini geniş ictimaiyyətə çatdırmaq, həmçinin yerli və beynəlxalq jurnalistlərin təcrübə mübadiləsi aparması baxımından xüsusi rol oynayır.
Medianın İnkişafı Agentliyinin İcraçı direktorunun müavini Natiq Məmmədli çıxışında Qarabağın dirçəlişi və Böyük Qayıdış mövzusunun Azərbaycan mediasının əsas prioriteti olduğunu vurğulayıb. O qeyd edib ki, bu hekayələr yalnız milli deyil, beynəlxalq səviyyədə də nümunədir. Storytelling vasitəsilə auditoriyaya faktlarla zəngin və inandırıcı mesaj çatdırılır.
İngilis tədqiqatçı və yazıçı Qrem Vilson isə Azərbaycan jurnalistlərinin Qarabağın dirçəlişi hekayələrini təqdim etməsinin qlobal mesaj daşıdığını diqqətə çatdırıb. Q.Vilson bildirib ki, bu, təkcə Azərbaycan və Qarabağ haqqında deyil, bütün dünya üçün modeldir – güclü milli liderliyin və xalqın birliyinin nələrə qadir olduğunu göstərən nümunədir. O, həmçinin Prezident İlham Əliyevin mina təhlükəsi ilə bağlı beynəlxalq təşəbbüslərinin humanitar əhəmiyyətini xüsusi vurğulayıb.
Medianın İnkişafı Agentliyinin Müşahidə Şurasının üzvü Şəfəq Mehrəliyeva hekayəçilik bacarığının auditoriya ilə əlaqə qurmaq və gələcək nəsillərə mesaj ötürmək baxımından əhəmiyyətini diqqətə çatdırıb. O, jurnalistlərin yeni yazı üsulları və multimedial təqdimat formalarını öyrənməsinin vacibliyini vurğulayıb.
Tədbirdə, həmçinin Azərbaycan Dövlət İnformasiya Agentliyinin fotomüxbiri Vüqar İbadov çıxış edərək işğaldan azad olunmuş ərazilərdə çəkdiyi fotoların Qarabağın dirçəliş hekayəsini çatdırmaq baxımından xüsusi əhəmiyyət daşıdığını deyib. Diqqətə çatdırıb ki, vizual media sözə nisbətən daha inandırıcıdır və auditoriyanın hekayəni daha dərindən hiss etməsinə imkan verir.
Panel görüş iştirakçıların suallarının cavablandırılması və diskussiyalar ilə davam edib, jurnalistlər hekayələrin hazırlanmasına və təqdimatına dair təcrübələrini bölüşüblər.
Bölmənin digər xəbərləri
