Elgün Məhəmmədəlizadə: Yarmarkada satışa çıxarılan bütün məhsullar laborator müayinədən keçib VİDEO
Bakı, 18 oktyabr, AZƏRTAC
Builki yubiley yarmarkasında Azərbaycanın müxtəlif bölgələrindən 280-dən çox arıçı-fermer iştirak edir və 100 tondan artıq məhsul satışa çıxarılıb.
AZƏRTAC xəbər verir ki, bu sözləri jurnalistlərə açıqlaması zamanı "Aqrar Tədarük və Təchizat" ASC-nin İdarə Heyətinin sədri Elgün Məhəmmədəlizadə söyləyib.
Sədr qeyd edib ki, hər il olduğu kimi bu il də satışa təqdim edilən arıçılıq məhsulları keyfiyyət göstəricilərinə görə laborator şəraitdə yoxlanılıb.
“Əvvəlki illərdə biz əsasən ballarda diastaz göstəricisini yoxlayırdıq. Bu ildən etibarən isə əlavə olaraq sakaroz göstəricisinin də təyininə başlanılıb. Bu göstəricilər balın təmizliyinin və keyfiyyətinin əsas meyarlarındandır. Yoxlamalar nəticəsində yalnız normativlərə cavab verən məhsullar satışa buraxılır. Bu, həm istehlakçıların sağlamlığı, həm də yarmarkanın etibarlı və keyfiyyət nişanlı satış platforması kimi mövqeyinin qorunması baxımından mühüm əhəmiyyət kəsb edir”, - deyə sədr vurğulayıb.
Elgün Məhəmmədəlizadə bildirib ki, yarmarkada saxta balın satışına yol verilməsi mümkün deyil: “Hər bir məhsul satışa təqdim olunmazdan əvvəl laborator analizlərdən keçir. Nümunələr Azərbaycan Qida Təhlükəsizliyi Agentliyinin əməkdaşları tərəfindən götürülür və müvafiq qaydada yoxlanılır. Diastaz göstəricisinin minimum 5, sakaroz göstəricisinin isə maksimum 15 faiz həddində olması satış üçün əsas şərtdir. Bu göstəricilərə cavab verməyən ballar yarmarkaya buraxılmır. Bu baxımdan əminliklə deyə bilərəm ki, yarmarkada təqdim olunan bütün ballar standartlara tam uyğundur və saxta məhsul yoxdur”.
Sədr onu da əlavə edib ki, yubiley münasibətilə bu il arıçılar üçün bir sıra yeniliklər tətbiq olunub.
“Arıçılara yaradılmış şərait tamamilə ödənişsizdir. Həmçinin onların məhsullarının brendləşdirilməsi və satış imkanlarının genişləndirilməsi məqsədilə qablaşdırma və etiketləmə xidmətləri "Aqrar Tədarük və Təchizat" ASC tərəfindən ödənişsiz şəkildə təmin edilir. Bu dəstək gələcəkdə məhsulların ixrac potensialının artırılmasına da xidmət edəcək. Yarmarka həm arıçılıq məhsullarının keyfiyyətinə nəzarətin gücləndirilməsi, həm də yerli istehsalçıların bazar imkanlarının genişləndirilməsi baxımından mühüm tədbirdir”, - deyə Elgün Məhəmmədəlizadə qeyd edib.
Bölmənin digər xəbərləri
