İcraçı direktor: İslam bankçılığı və kapital bazarı alətləri investor dairəsini genişləndirə bilər VİDEO
Bakı, 22 oktyabr, AZƏRTAC
Oktyabrın 1-nə bank sektorunun aktivləri ötən ilin eyni tarixi ilə müqayisədə 13 faiz artaraq 63,6 milyard manata, depozit portfeli illik 15 faiz artaraq 42,3 milyard manata, fiziki şəxslərin əmanətləri isə 20 faiz artaraq 18,4 milyard manata çatıb. Balans kapitalı illik 9 faiz artımla 7,84 milyard manata çatıb. İlk doqquz ayda xalis mənfəət ötən ilin eyni dövrü ilə müqayisədə 19 faiz artaraq 1,08 milyard manata yüksəlib.
AZƏRTAC xəbər verir ki, bu barədə Azərbaycan Banklar Assosiasiyasının icraçı direktoru Yunus Abdulov 3-cü İslam Maliyyə Forumunda deyib.
“Bu genişlənmə kreditləşmədə də özünü göstərib. Ümumi kredit portfeli isə 15 faiz artaraq 33,7 milyard manata çatıb. Biznes kreditlərinin artım tempi isə istehlak və ipoteka kreditlərini üstələyərək 19 faiz olub və oktyabrın 1-nə 18,5 milyard manata yüksəlib. Biznesə dəstək məqsədi ilə banklarımız tərəfindən son dövrlərdə alternativ alətlərin tətbiqi də bu artıma öz töhfəsini verməkdədir. Bu alətlər sırasına ən son əlavə olunanlar isə məhz islam maliyyəsi alətləridir. Belə ki, bu ilin fevral ayından etibarən Mərkəzi Bankın xüsusi tənzimləmə rejimində banklarımız “Mudaraba” və “Murabaha” məhsullarını təqdim edir. Bu pilotlar müştəri tələbatını öyrənmək, müqavilələri və əməliyyat proseslərini təkmilləşdirmək üçün praktik imkan yaradır”, - deyə o bildirib.
Y.Abdulov qeyd edib ki, həmin təcrübənin daha geniş tətbiqi üçün hüquqi bazanın tamamlanması vacibdir: “Bu istiqamətdə müvafiq normativ-hüquqi akt layihələri artıq hazırlanıb. Hüquqi çərçivənin formalaşdırılması bankların yeni məhsulları daha aydın qaydalar əsasında inkişaf etdirməsinə şərait yarada bilər. Hüquqi hazırlıq bankların daxilində müvafiq əməliyyat və nəzarət mexanizmlərinin qurulması ilə tamamlanmalıdır. Ayrıca uçotun aparılması, vəsaitlərin ayrılması və Şəriət prinsiplərinə uyğunluğun yoxlanılması bu baxımdan mühüm əhəmiyyət daşıyır. Bunun üçün hüquqşünasların, bank mütəxəssislərinin və şəriət ekspertlərinin birgə hazırlığına ehtiyac var. Bu hazırlığın müştəri ilə münasibətlərdə əsas nəticəsi etimad olmalıdır. Müştəriyə məhsulun gəlir mexanizmi, öhdəlikləri və riskləri sadə dillə izah edilməlidir. Bu il banklarımız tərəfindən aparılmış maliyyə savadlılığı tədbirləri çərçivəsində 3 milyon çatımlılıq göstəricisi ilə maarifləndirmə işləri görülüb. Bununla yanaşı, müştəri müraciətləri zamanı da effektiv kommunikasiya üçün bank əməkdaşının bunu düzgün izah etməsi məhsulun hazırlanması qədər vacibdir. Müştərinin etimadı gündəlik əməliyyatlarda doğruldulmalıdır”.
"Azərbaycan Banklar Assosiasiyasının Alternativ Bankçılıq Şurasının və Azərbaycan Bank və Maliyyə Tədris Mərkəzinin maarifləndirici fəaliyyəti də bu məqsədə xidmət edir. Banklar arasında təcrübə mübadiləsinin genişləndirilməsi, təlimlərin praktik məhsullar üzərində qurulması və rəqəmsal xidmətlərdə şərtlərin aydın təqdim edilməsi faydalı olar. Türkiyə, Malayziya və Körfəz ölkələrinin təcrübəsinin yerli hüquqi və iqtisadi şəraitə uyğunlaşdırılmasını da vacib hesab edirik. Beynəlxalq əməkdaşlıq maliyyələşmə imkanlarının genişləndirilməsi baxımından da əhəmiyyətlidir. İslam bankçılığı və kapital bazarı alətləri əlavə maliyyələşmə kanalı yarada, investor dairəsini genişləndirə bilər. İslam İnkişaf Bankı İnstitutu və ITFC-nin Azərbaycan üzrə hesabatı da ölkəmizin bu sahədə inkişaf imkanlarına diqqət yönəldir. Halal istehsal və ticarətin uyğun maliyyələşmə alətləri ilə dəstəklənməsi isə sahibkarlarımızın regional bazarlara çıxışına töhfə verə bilər. Hədəfimiz sahibkarın ehtiyacına cavab verən, vətəndaşın şərtlərini anladığı və etibar etdiyi maliyyə xidmətləridir. İnanıram ki, bu forumdakı müzakirələr banklar və tərəfdaşlarımız arasında konkret məhsullar, birgə təlimlər və yeni əməkdaşlıqlarla davam edəcək", - deyə Y.Abdulov əlavə edib.
Bölmənin digər xəbərləri
