Azərbaycan Memarlıq və İnşaat Universitetinin 40 illik yubileyi qeyd edilib VİDEO
Bakı, 23 iyun, M.Dadaşov, P.İmanova, G.Məlikova, AZƏRTAC
İyunun 23-də “Gülüstan” sarayında Azərbaycan Memarlıq və İnşaat Universitetinin (AzMİU) müstəqil ali təhsil ocağı kimi fəaliyyətə başlamasının 40 illiyinə həsr olunan yubiley mərasimi keçirilib.
Mərasimdə dövlət və hökumət rəsmiləri, Milli Məclisin deputatları, elmi ictimaiyyətin təmsilçiləri, dünyanın müxtəlif ölkələrindən olan alimlər, ali məktəb rektorları, Azərbaycanda akkreditə olunmuş diplomatik korpusun nümayəndələri iştirak ediblər.
AZƏRTAC xəbər verir ki, əvvəlcə tədbir iştirakçıları Fəxri xiyabana gələrək xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini ehtiramla yad edib, məzarı önünə əklil qoyublar.
Görkəmli oftalmoloq alim, akademik Zərifə xanım Əliyevanın da xatirəsi ehtiramla anılıb, məzarı üzərinə tər güllər düzülüb.
Tədbirdə əvvəlcə Dövlət himni səsləndirilib, AzMİU-nun 40 illiyinə həsr olunan film nümayiş etdirilib.
Universitetin rektoru, professor Gülçöhrə Məmmədova AzMİU-nun keçdiyi inkişaf yolundan, ölkəmizdə 95 illik memarlıq və inşaat ali təhsilinin tarixindən, bu illər ərzində əldə edilən uğurlardan, qarşıda duran vəzifələrdən danışıb. Universitetin yaradılmasında və inkişafında xalqımızın ümummilli lideri Heydər Əliyevin əvəzsiz xidmətlərinin olduğunu vurğulayan G.Məmmədova Ulu Öndərin həmişə bu ali təhsil ocağına xüsusi diqqət və qayğı göstərdiyini bildirib. Qeyd edilib ki, 1975-ci ildə ümummilli lider Heydər Əliyevin şəxsi təşəbbüsü ilə yaradılan AzMİU ötən müddətdə zəngin inkişaf yolu keçib. Hazırda inkişafının yeni mərhələsini yaşayan AzMİU-da Prezident İlham Əliyevin qayğısı və dəstəyi ilə son illərdə müasir texniki avadanlıq və ləvazimatla təchiz edilmiş tədris laboratoriyaları və mərkəzlər istifadəyə verilib.
Universitetin akademik göstəriciləri haqqında məlumat verən G.Məmmədova təhsil ocağının zəngin maddi-texniki imkanlara və qabaqcıl təcrübəyə malik olduğunu bildirib. Qeyd olunub ki, universitetdə yeddi minədək tələbənin təlim-tərbiyəsi ilə 550-dək müəllim və elmi işçi məşğul olur. AzMİU-da dünyanın 14 ölkəsindən 700 əcnəbi tələbə təhsil alır. Təhsil Nazirliyinin təşəbbüsü ilə yerli və beynəlxalq əmək bazarında rəqabətə davamlı kadr hazırlığı həyata keçirmək məqsədilə yaradılmış “SABAH” qrupları AzMİU-da uğurla fəaliyyət göstərir.
Diqqətə çatdırılıb ki, hazırda dünyanın aparıcı universitetləri ilə əməkdaşlıq edən AzMİU bir sıra beynəlxalq qurumlarının üzvüdür, dünyanın bir neçə qabaqcıl universiteti ilə ikili diplom proqramı üzrə mütəxəssislər hazırlayır. Rektor gənclərin elmə, təhsilə, maraqlarının artması nəticəsində bu ali təhsil ocağının bundan sonra daha böyük nailiyyətlər qazanacağına əminliyini bildirib.
G.Məmmədova vurğulayıb ki, Prezident İlham Əliyevin müvafiq sərəncamları ilə AzMİU-nun bir qrup əməkdaşı “Azərbaycan Respublikası Prezidentinin fəxri diplomu” və “Tərəqqi” medalı ilə təltif edilib, “Əməkdar müəllim” fəxri adına layiq görülüb. Rektor yüksək təltiflərə görə dövlətimizin başçısına universitetin kollektivi adından dərin minnətdarlığını bildirib.
Universitetin kollektivini yubiley münasibətilə təbrik edən təhsil naziri Mikayıl Cabbarov zəngin ənənələrə malik AzMİU-nun 40 illik elmi-pedaqoji fəaliyyətindən, ölkəmizdə elm və təhsilin inkişafına göstərilən dövlət qayğısından danışıb. Azərbaycanda ali təhsil sahəsində həyata keçirilən islahatların əsas istiqamət və hədəflərindən bəhs edən nazir vurğulayıb ki, əldə olunan uğurlar davamlı xarakter daşıyır. O deyib: “Ali təhsilin qloballaşması nəticəsində alətlər dəyişir, təhsil sisteminin real iqtisadiyyatla bağlantısı daha da artır. Müasir dünyada ali təhsil müəssisələri təkcə elm-tədris funksiyasını deyil, həm də iqtisadi artım mərkəzi rolunu oynayır”.
Təhsil naziri dövlətimizin başçısının yubiley münasibətilə AzMİU-nun əməkdaşlarının ali dövlət mükafatları ilə təltif olunması barədə sərəncamlarını tədbir iştirakçılarının diqqətinə çatdırıb, mükafatları sahiblərinə təqdim edib.
Azərbaycanda son dövrdə həyata keçirilən geniş tikinti və quruculuq işlərindən danışan Baş nazirin müavini Abid Şərifov vurğulayıb ki, bu gün paytaxtımızda və regionlarda aparılan bu işlər ölkə Prezidentinin bu sahəyə göstərdiyi böyük diqqətin təzahürüdür. Son illər ölkəmizin bir sıra nüfuzlu beynəlxalq tədbirlərin, o cümlədən möhtəşəm idman yarışlarının keçirildiyi məkana çevrildiyini bildirən A.Şərifov xarici qonaqların Bakının müasir və tarixi binalarının arxitektura gözəlliyinə heyran qaldıqlarını vurğulayıb. O, ölkəmizdə memarlıq və inşaat təhsilinin inkişafında və peşəkar kadrların hazırlanmasında AzMİU-nun fəaliyyətini yüksək dəyərləndirib.
Tədbirdə Azərbaycan Respublikası Dövlət Neft Şirkətinin prezidenti Rövnəq Abdullayev, Müəllif Hüquqları Agentliyinin sədri Kamran İmanov, Azərbaycan Milli Elmlər Akademiyasının vitse-prezidenti, Milli Məclisin deputatı, akademik İsa Həbibbəyli, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, “Meliorasiya və Su Təsərrüfatı” Açıq Səhmdar Cəmiyyətinin sədri Əhməd Əhmədzadə, Bakı Dövlət Universitetinin rektoru, akademik Abel Məhərrəmov, Azərbaycan Memarlar İttifaqı idarə heyətinin sədri Elbay Qasımzadə AzMİU-nun fəaliyyətindən, qazandığı uğurlardan danışıb, kollektivi yubiley münasibətilə təbrik ediblər.
Azərbaycanda memarlıq və inşaat təhsilinə göstərdikləri diqqət və qayğıya görə bir çox dövlət və özəl şirkətlər AzMİU rəhbərliyi tərəfindən fəxri fərmanla təltif olunub. Eyni zamanda, universitetdə keçirilən tədbirlərin mətbuatda işıqlandırılmasına göstərdikləri informasiya dəstəyinə görə bəzi KİV-lər mükafatlandırılıb.
AzMİU-nun bir qrup əməkdaşına Təhsil Nazirliyinin “Azərbaycan Respublikasının qabaqcıl təhsil işçisi” döş nişanı və fəxri fərmanı təqdim olunub.
Sonda universitetin kollektivi adından Prezident İlham Əliyevə ünvanlanmış müraciət oxunub.
Bölmənin digər xəbərləri
