«ƏVƏSOR»UN UĞURLARI ARTIR
AZƏRTAC xəbər verir ki, Astara rayonunun Kakalos kənd mədəniyyət evində fəaliyyət göstərən «Əvəsor» folklor kollektivi təkcə respublikamızda deyil, beynəlxalq müsabiqə və festivallarda da orijinal və məzmunlu çıxışları ilə tamaşaçıların rəğbətini qazanmışdır. Kollektivin üzvləri Türkiyə, Rumıniya, Rusiya və Dağıstanda keçirilən beynəlxalq festivallarda uğurla çıxış edərək, müxtəlif diplom və qiymətli hədiyyələrə layiq görülmüşlər.
1985-ci ildə ali təhsilli mədəniyyət işçisi Fərbiyyə Şabanovanın rəhbərliyi ilə yaradılan «Əvəsor» folklor kollektivinə 2000-ci ildə Mədəniyyət Nazirliyi kollegiyasının qərarı ilə «Xalq kollektivi» adı verilmişdir.
Kollektivin repertuarındakı el nəğmələri, laylalar, milli rəqslər Fərbiyyə Şabanovanın və Şadoğlan Bayramovun 2004-cü ildə nəşr olunmuş «Talış bölgəsinin nəğmələri» kitabına daxil edilmişdir.
«Əvəsor» xalq kollektivinin nəzdində «Nəcib qızlar klubu» da fəaliyyət göstərir. Klubun üzvlərinin milli tikmələri, dolamaları, xanduzları və digər əl işləri Bakı, Şirvan, Neftçala və Lənkəran şəhərlərində keçirilən sərgilərdə tamaşaçılar tərəfindən rəğbətlə qarşılanmışdır.
Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzi və Respublika Rəssamlar İttifaqının Lənkəran şəhərində keçirdikləri həvəskar rəssamların və tətbiqi sənət ustalarının əl işlərinin zona baxış-müsabiqəsində «Nəcib qızlar klubu»nun üzvləri də iştirak etmiş, qızların «Lalələr», «Bənövşələr» və «Mənzərə» rəsm əsərləri baxış-müsabiqənin Bakı şəhərində keçiriləcək yekun mərhələsinə vəsiqə qazanmışdır. Kollektivin rəhbəri Fərbiyyə Şabanovaya fəxri fərman verilmişdir.
Bölmənin digər xəbərləri
