CƏMİYYƏT
Əhalinin rifah halının yaxşılaşması sosial dövlətin başlıca prioritetidir
Bakı, 12 yanvar, AZƏRTAC
Cari il yanvarın 1-dən ölkəmizdə minimum əməkhaqqının 345 manata çatdırılması ölkəmizdə aztəminatlı təbəqələrin maddi vəziyyətinin yaxşılaşdırılması sahəsində aparılan ardıcıl siyasətin növbəti addımı olub. İqtisadi nəzəriyyəyə görə, minimum əməkhaqqının yüksəlməsi hər şeydən əvvəl yoxsul ailələrin gəlirlərinin, həmçinin gənclər arasında məşğulluğun artmasına təsir edir və gənclərdə işəgötürənlər tərəfindən təklif edilən işlərə maraq yaradır. Bu da öz növbəsində aztəminatlı ailələrin maddi vəziyyətinin yaxşılaşdırılmasına müsbət təsir göstərir.
AZƏRTAC xəbər verir ki, bu barədə Milli Məclisin deputatı Arzu Nağıyev Prezident İlham Əliyevin yerli televiziya kanallarına müsahibəsinin əsas istiqamətlərini şərh edərkən deyib.
Deputat deyib: “Azərbaycanda fəal olaraq minimum əməkhaqqının artırılmasına 2019-cu ildən başlanılıb. Həmin il martın 1-dən minimum əməkhaqqı 130 manatdan 180 manata, sentyabrın 1-dən isə 250 manata qaldırılıb. Minimum əməkhaqqının artırılması postpandemiya dövründə də davam etdirilib. 2021-ci il dekabrın 17-də ölkə başçısının Sərəncamı ilə minimum əməkhaqqı 2022-ci il yanvarın 1-dən 300 manata qaldırılıb. 2023-cü il yanvarın 1-dən isə bu göstərici 345 manata qədər yüksəlib. Son dörd ildə bu göstərici 2,7 dəfə artıb. Minimum əməkhaqqının artırılması təbii ki, qrayder rolu oynayıb və ölkə üzrə orta maaş göstəricisi də artıb. Belə ki, 2019-2022-ci illər də Azərbaycanda orta aylıq əməkhaqqı 52 faiz artıb. Hazırda ölkəmizdə orta aylıq əməkhaqqı 830 manatın ətrafında dəyişir. 2020-ci ilin əvvəlində isə bu göstərici 730 manat ətrafında olub. Göründüyü kimi, yalnız 2022-ci ildə Azərbaycanda orta maaş göstəricisi 100 manat, yaxud 14 faiz artıb. Dövlət başçısı bu tendensiyanın davamı kimi bu ilin sonunda ölkə üzrə orta maaş göstəricisinin 900 manata yaxın olacağının pronozlaşdırıldığını deyib. Əlbəttə ki, orta aylıq əməkhaqqı sahəsindəki artım tendensiyası göz qabağındadır”.
O, ehtiyacı olanlara sosial yardım verilməsində son illər aparılan şəffaflaşmadan bəhs edərək qeyd edib ki, hazırda 60 minə yaxın ailə dövlətdən ünvanlı sosial yardım alır və ildən-ilə bu yardımın məbləği artır. Əgər hazırda bir ailəyə düşən müavinət təqribən 460 manat səviyyəsindədirsə, il ərzində həmin məbləğin daha da artırılacağı gözlənilir.
Müsahibimiz fikrinin yekununda bunları deyib: “Hazırda ölkə üzrə bağlanan əmək müqavilələrinin sayı 1 milyon 741 mindir. Əmək müqavilələrinin sayının bu cür artırılması insanların ahıl yaşlarında etibarlı maddi təminatına imkan yaradır, çünki ağardılan biznes sahəsində onların ümid etdikləri əmək pensiyaları da artır və bütövlükdə ölkədə sosial rifahın dayanıqlıq göstəricisi yüksəlir. Bu müsbət artım göstəriciləri son dörd ildə həyata keçirilən üç sosial islahat paketinin icrası nəticəsində əldə edilib. 4 milyon vətəndaşı əhatə edən həmin paketlər çərçivəsində dövlət tərəfindən 6 milyard manat ayrılıb. 2023-cü il üçün nəzərdə tutulmuş yeni sosial islahat paketi isə milyona yaxın insanı əhatə edəcək və daha 750 milyon manat əlavə vəsaitin ayrılması nəzərə tutulur. İndiyədək 60 min ailə özünüməşğulluq proqramına cəlb olunub və həmin ailələr aktivlər, lazımi avadanlıqlarla təmin olunub. Ayrılan bu vəsaitlər Azərbaycanın sadə insanlarına daha rifahlı həyat təmin edir və daha etibarlı gələcək vəd edir”.