Hulusi Kılıç: Prezident İlham Əliyev Türk dünyasının inteqrasiyası prosesinin ön sıralarındadır
Ankara, 20 avqust, AZƏRTAC
Müasir beynəlxalq münasibətlər sistemində Türk Dövlətləri Təşkilatının (TDT) prioriteti Türk dünyasının gələcəyidir. Qarşıya qoyulmuş vəzifələrə nail olmaq TDT çərçivəsində birliyin və inteqrasiyanın daha da möhkəmləndirilməsini tələb edir. Azərbaycan Prezidenti İlham Əliyev faktiki olaraq bu prosesin ön sıralarında dayanan siyasətçidir.
Bunu Türkiyənin Azərbaycandakı sabiq səfiri, İMZA Sosial İnkişafa Dəstək İctimai Birliyinin Türkiyədəki nümayəndəsi Hulusi Kılıç AZƏRTAC-ın müxbirinə müsahibəsində deyib.
Sabiq səfir Prezident İlham Əliyevin Türk dünyasında həmrəyliyin möhkəmləndirilməsinə verdiyi töhfəni xüsusi vurğulayıb.
“Dünyada açıq və gizli ittifaqların və alyansların formalaşdığı bir şəraitdə türk dövlətlərinin birlik və əməkdaşlığı möhkəmləndirməsi, şəxsi maraqlarını qoruması onların təbii hüququdur. Azərbaycan lideri nüfuzlu dövlət xadimi və müdrik strateq kimi qlobal proseslərin gedişatını qabaqcadan görür, dəqiq qiymətləndirmələr aparır və vaxtında qərarlar qəbul edir”, - deyə H.Kılıç bildirib.
İMZA İctimai Birliyinin nümayəndəsi xatırladıb ki, türk birliyinin təməllərinin əsası bir neçə gün əvvəl Azərbaycan Prezidentinin səfər etdiyi Naxçıvan Muxtar Respublikasında qoyulmağa başlayıb.
“Turanın pəncərəsi” adlandırılan Naxçıvan yenidən Türk dünyasının gündəliyindədir. Zəngəzur dəhlizinin reallaşdırılması, şübhəsiz ki, Naxçıvanı Avrasiyanın əsas halqalarından birinə çevirəcək və bu, heç də uzaq perspektiv deyil. Çox yaxın zamanda bu prosesin real bəhrələrini görməyə başlayacağıq”, - deyə türkiyəli sabiq diplomat əminliyini ifadə edib.
O, Naxçıvan Muxtar Respublikasını “Azərbaycanın nailiyyətlərinin nümayiş etdirildiyi məkanlardan biri” adlandırıb: “Müasir Naxçıvan Prezident İlham Əliyevin rəhbərliyi ilə Azərbaycanın əldə etdiyi uğurların, həqiqətən də parlaq və nümunəvi göstəricisidir”.
İMZA İctimai Birliyinin nümayəndəsi qeyd edib ki, Azərbaycanda həyata keçirilən islahatlar və transformasiyalar yalnız Türkiyədə deyil, Özbəkistanda, Türkmənistanda, Qazaxıstanda və Qırğızıstanda da diqqətlə izlənilir.
H.Kılıç yaxın gələcəkdə Türk dünyasının inteqrasiyası prosesinin sürətlənəcəyinə əminliyini ifadə edib. “Qlobal nizam BMT Təhlükəsizlik Şurasının beş üzv ölkəsinin maraqları ilə məhdudlaşmır. Əminəm ki, türk dövlətləri Dünya liderləri Liqasında layiqli yer tutacaqlar. TDT ölkələri, şübhəsiz ki, yeni dünya nizamında öz mövqelərini daha da möhkəmləndirəcəklər”, - deyə o, fikirlərini yekunlaşdırıb.
Bölmənin digər xəbərləri
