Naxçıvan Orta Dəhlizin mühüm nəqliyyat qovşağına çevriləcək - ŞƏRH
Bakı, 20 avqust, AZƏRTAC
Orta Dəhliz Çin və Mərkəzi Asiyadan başlayaraq Xəzər dənizi, Azərbaycan, Gürcüstan və Türkiyə üzərindən Avropaya uzanan Trans-Xəzər marşrutudur. Marşrutun əsas üstünlüklərindən biri Asiya ilə Avropa arasında daşımaların vaxt və məsafə baxımından optimallaşdırılmasıdır. Azərbaycan bu xəttin mərkəzi halqalarından biri kimi yalnız tranzit ölkə deyil, Şərqlə Qərbi, eyni zamanda, Şimalla Cənubu birləşdirən multimodal logistika qovşağına çevrilmək imkanına malikdir.
Bu fikirləri AZƏRTAC-a açıqlamasında Sosial Strateji Tədqiqatlar və Analitik Araşdırmalar Mərkəzinin rəhbəri İlqar Hüseynli deyib.
Onun sözlərinə görə, Azərbaycanın üstünlüyü onun coğrafi mövqeyi ilə yanaşı, son illərdə formalaşdırdığı Bakı limanı, logistika infrastrukturu dəmir və avtomobil yolları ilə bağlıdır. Daha mühüm məqam isə müxtəlif dəhlizlərin bir-biri ilə inteqrasiyasıdır. Bu, Azərbaycanın gələcəkdə, sadəcə, yükün ərazisindən keçdiyi tranzit məkan deyil, həm də onun çeşidləndirildiyi, saxlanıldığı, emal olunduğu və yenidən ixrac edildiyi regional logistika mərkəzinə çevrilməsinə şərait yarada bilər.
“Bu mənzərədə Naxçıvanın rolu xüsusilə diqqətçəkəndir. Bu bölgə Azərbaycanın əsas ərazisindən ayrı yerləşsə də, Türkiyə ilə birbaşa sərhədə malik olması ona böyük geoiqtisadi üstünlük verir. Zəngəzur istiqamətində nəqliyyat bağlantısının yaradılması Naxçıvanı ölkəmizin coğrafi baxımdan təcrid olunmuş hissəsindən Şərq–Qərb nəqliyyat sisteminin mühüm qovşağına çevirəcək. Rəsmi strategiyada bu xətt həm Azərbaycanın əsas hissəsi ilə Naxçıvan arasında əlaqənin bərpası, həm də Orta Dəhlizin yeni seqmentinin formalaşdırılması kimi qiymətləndirilir”, – deyə o qeyd edib.
İlqar Hüseynli bildirib ki, Naxçıvana yalnız “çıxış yolu açılacaq ərazi” kimi baxmaq düzgün olmaz. Əksinə, bu bölgənin gələcəkdə logistika və yükdaşıma mərkəzi, Azərbaycan–Türkiyə arasında mühüm nəqliyyat qovşağı, Orta Dəhlizin alternativ marşrutlarından biri, enerji və kommunikasiya layihələrinin keçid məkanı, turizm və xidmət sektorunun regional mərkəzi, İran və Türkiyə bazarları ilə əlaqəli ticarət platforması kimi formalaşması mümkündür.
“Naxçıvanın bu imkanlardan yararlanması regionun iqtisadi və nəqliyyat əlaqələrinin genişlənməsinə, yeni investisiyaların cəlb olunmasına, logistika, ticarət, turizm və xidmət sahələrinin inkişafına şərait yarada bilər. Bu proses, eyni zamanda, yeni iş yerlərinin yaranmasına və əhalinin sosial rifahının yüksəlməsinə töhfə verə bilər. Orta Dəhlizin inkişafı və Naxçıvanın bu nəqliyyat sisteminə daha sıx inteqrasiyası Azərbaycanın regional logistika və ticarət imkanlarını genişləndirərək, ölkənin Şərqlə Qərb, eləcə də Şimalla Cənub arasında mühüm bağlantı məkanı kimi rolunu daha da gücləndirə bilər”, - deyə o diqqətə çatdırıb.
Bölmənin digər xəbərləri
