İDMAN


DOQQUZ YAŞLI QAX MƏKTƏBLİSİ XANIM BALACAYEVANIN BÖYÜK UĞURU

Qax, 4 avqust (AZƏRTAC). Avqustun 4-də Qax rayon İcra hakimiyyətində Türkiyənin Kayseri şəhərində məktəblilər arasında yenicə başa çatmış şahmat üzrə 6-cı dünya çempionatının qalibi, doqquz yaşlı Qax məktəblisi Xanım Balacayeva ilə rayon ictimaiyyətinin görüşü olmuşdur.

Rayon rəhbərliyi, balaca çempion və ictimaiyyətin nümayəndələri əvvəlcə ümummilli liderimiz Heydər Əliyevin Qax şəhərinin mərkəzi meydanında ucaldılmış abidəsi önünə tər çiçəklər düzmüş, xatirəsini ehtiramla yad etmişlər.

Tədbiri giriş sözü ilə açan rayon İcra hakimiyyətinin başçısı Musa Şəkiliyev bildirmişdir ki, bu gün hər birimizin ürəyi böyük iftixar hissi ilə döyünür. Bu da təsadüfi deyildir. Rayonumuzun təmsilçisi Xanım Balacayeva Qax rayonunun şahmat ənənələrini uğurla davam etdirərək doqquz yaşlı məktəblilər arasında dünya çempionu adına layiq görülmüşdür. Çox fərəhlidir ki, X.Balacayeva bu yüksək ada layiq görülmüş üçüncü şahmatçımızdır. Bundan əvvəl beynəlxalq qrossmeyster Aynur Sofiyeva və FİDE ustası Pərvanə İsmayılova da bu şərəfli ada layiq görülmüşlər.

Bildirilmişdir ki, idman sahəsində qazanılan uğurlar ümummilli liderimiz Heydər Əliyevin adı ilə sıx bağlıdır. Məhz ulu öndərin diqqət və qayğısı sayəsində 1994-cü ildə respublikamızda Gənclər və İdman Nazirliyi yaradılmış, idmanın maddi-texniki bazasının möhkəmləndirilməsi üçün ardıcıl tədbirlər həyata keçirilmişdir. Hazırda bu siyasi xətt Prezident İlham Əliyev tərəfindən uğurla davam etdirilir. Dövlətimizin başçısının idman və bədən tərbiyəsinin tərəqqisi, Azərbaycanın dünya idman ailəsinin bərabərhüquqlu üzvünə çevrilməsi üçün atdığı addımlar ölkənin bütün idman ictimaiyyəti tərəfindən böyük razılıqla qarşılanır.

Tədbirdə rayon gənclər və idman idarəsinin rəisi Əlövsət Bayramov çıxış edərək rayon idmançılarının respublika və beynəlxalq miqyaslı yarışlarda qazandıqları uğurlar barədə danışmışdır. Bildirmişdir ki, yeni dünya çempionu Xanım Balacayeva şahmatla 5 yaşından məşğul olmağa başlamışdır. 2008-ci ildə səkkiz yaşlı qızlar arasında Azərbaycan çempionatında 2-ci, elə həmin il Gürcüstanın Batumi şəhərində keçirilmiş Avropa çempionatında 5-ci, 2009-cu ildə səkkiz yaşlı qızlar arasında Azərbaycan çempionatında 1-ci yeri tutmuşdur. Balaca şahmatçı 2009-cu ildə Batumidə keçirilmiş Avropa çempionatında 4-cü, 2010-cu ildə isə 10 yaşadək qızlar arasında Azərbaycan çempionatında 1-ci yerə çıxmışdır.

Mərkəzi rayon xəstəxanasının baş həkimi Fərman Əhmədzadə, rayon təhsil şöbəsinin müdiri Məmməd Xasıyev, kunq-fu üzrə dünya çempionu Ömər Balacayev və başqaları çıxış edərək Xanım Balacayevanın bu möhtəşəm qələbəsinin Qaxın idman həyatında çox əlamətdar hadisə olduğunu bildirmiş, balaca şahmatçıya gələcək yarışlarda uğurlar arzulamışlar.

Sonra dünya çempionu Xanım Balacayeva, habelə Xarkov şəhərində keçirilmiş çoxnövçülük üzrə dünya çempionatının qalibi Ramin Məmmədov çıxış edərək göstərilən diqqət və qayğıya görə minnətdarlıqlarını bildirmişlər.

Tədbirin sonunda hər iki idmançıya rayon İcra hakimiyyətinin fəxri fərmanı, qiymətli hədiyyə və pul mükafatları təqdim edilmişdir.

######

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.