SİYASƏT


İstefada olan general-polkovnik Tofiq Ağahüseynov son mənzilə yola salınıb

Bakı, 13 may, AZƏRTAC

İkinci Dünya müharibəsi iştirakçısı, istefada olan general-polkovnik Tofiq Yaqub oğlu Ağahüseynov İkinci Fəxri xiyabanda son mənzilə yola salınıb.

Müdafiə Nazirliyinin mətbuat xidmətindən AZƏRTAC-a bildiriblər ki, vida mərasimində görkəmli hərbi xadimin mənalı ömür yolu xatırlanıb, onun Vətən və xalq qarşısında xidmətləri qeyd olunub.

Diqqətə çatdırılıb ki, T.Ağahüseynov 1923-cü il fevralın 1-də anadan olub. Yeddi yaşında olarkən ata-anası və özündən böyük iki qardaşı ilə Bakıya köçüblər. Orta təhsilini başa vurduqdan sonra ovaxtkı Azərbaycan Sənaye İnstitutunun Energetika fakültəsinə daxil olub və oranı müvəffəqiyyətlə bitirib. 1941-ci ildə Bakı Zenit Artilleriya Məktəbində il yarım oxuduqdan sonra ona leytenant hərbi rütbəsi verilib və döyüşlərə yollanıb.

İkinci Dünya müharibəsində 1-ci Belarus cəbhəsində tağım komandiri, əlahiddə zenit artilleriyası divizionu qərargah rəisinin köməkçisi olub, Visla-Oder və Berlin əməliyyatlarında iştirak edib. Müharibə bitdikdən sonra T.Ağahüseynovun qulluq etdiyi diviziya 1946-cı ilin oktyabrına qədər Almaniyada qalıb. O, 1949-cu ildə Dzerjinski adına Hərbi Akademiyaya, bunun ardınca Hərbi Artilleriya Akademiyasına daxil olub.

T.Ağahüseynov 1960-1964-cü illərdə Hövsanda yerləşən Hava Hücumundan Müdafiə polkuna komandirlik edib, 1964-cü ilin sonlarında Volqoqradda diviziya komandiri kimi xidmətini davam etdirib. 1968-ci ildə general-mayor rütbəsi alıb. 1969-cu ildən Rostovda yerləşən hərbi birliyə korpus komandiri təyin edilib. 1972-ci ildə general-leytenant rütbəsi alıb və 1975-ci ildə Bakı Dairəsi Hava Hücumundan Müdafiə Komandanının birinci müavini təyin edilib. 1980-ci ildə general-polkovnik rütbəsini alan T.Ağahüseynova Bakı Dairəsi Hava Hücumundan Müdafiə Komandanı vəzifəsi həvalə edilib. O, SSRİ Silahlı Qüvvələrində general-polkovnik rütbəsi alan ilk azərbaycanlı olub. T.Ağahüseynov 1982-ci ildə Varşava Müqaviləsi dövlətlərinin birləşmiş silahlı qüvvələri baş komandanlığının Çexoslovakiyadakı nümayəndəsi təyin olunub. Sovet Ordusu sıralarından azad edildikdən sonra T.Ağahüseynov daimi yaşamaq üçün Bakıya qayıdıb. O, üç çağırış Azərbaycan SSR Ali Sovetinin deputatı seçilib.

Azərbaycan xalqının ümummilli lideri Heydər Əliyevin 1997-ci il 17 aprel tarixli Sərəncamı ilə Tofiq Ağahüseynov prezidentin hərbi məsələlər üzrə köməkçisi təyin olunub.

Müharibə illərində və sonralar dövlətin ali mükafatlarına, orden və medallara layiq görülüb. O, “Qırmızı Bayraq”, “Oktyabr İnqilabı”, “Birinci Dərəcəli Vətən Müharibəsi”, “Qırmızı Ulduz” ordenləri ilə təltif olunub.

Azərbaycan Respublikasının Prezidenti İlham Əliyevin 2008-ci il 1 fevral tarixli Sərəncamı ilə Azərbaycanda hərbi qulluqçuluq sahəsində xidmətlərinə görə “Şöhrət” ordeni ilə, 2013-cü il 17 yanvar tarixli Sərəncamı ilə Azərbaycan Respublikası Silahlı Qüvvələrinin formalaşdırılmasında və hərbçi kadrların hazırlanmasında xüsusi xidmətlərinə görə “Azərbaycan Bayrağı” ordeni və 2018-ci il yanvarın 31-də Azərbaycan Respublikası Prezidentinin fəxri diplomu ilə təltif olunub.

Dəfn mərasimində əsgəri ənənələrə uyğun olaraq Dövlət Himni səsləndirilib və havaya yayılım atəşi açılıb. Mərhumun məzarı üzərinə Azərbaycan Respublikasının Prezidenti, Azərbaycan Respublikasının Müdafiə Nazirliyi, Respublika Veteranlar Şurası adından əklillər qoyulub.

Dəfn mərasimində iştirak edən Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının Hərbi məsələlər şöbəsinin müdiri, general-polkovnik Məhərrəm Əliyev tabut üzərinə sərilən dövlət bayrağını xatirə saxlamaq üçün mərhumun ailəsinə təqdim edib və dərin hüznlə başsağlığı verilib.

Mərhumun ailə üzvləri göstərilən diqqət və qayğıya görə Azərbaycan Respublikasının Prezidenti İlham Əliyevə və Müdafiə Nazirliyinin rəhbərliyinə minnətdarlıqlarını bildiriblər.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.