MƏDƏNİYYƏT


Kitabxanada yazıçı-publisist Ulduz Qasımın kitablarının təqdimatı olub

Bakı, 7 may, AZƏRTAC

Respublika Gənclər Kitabxanasında Moskvada yaşayan soydaşımız, yazıçı-publisist Ulduz Qasımın son zamanlarda çapdan çıxmış üç kitabının – “Qarabağda qiyamət”, “Ağ göyərçinlər” və “Qaçaq Aslan” əsərlərinin təqdimatı keçirilib.

AZƏRTAC xəbər verir ki, Respublika Gənclər Kitabxanasının direktoru Aslan Cəfərov öz çıxışında qəlbi daim vətən sevgisi ilə döyünən, vətənpərvər xanım Ulduz Qasımın yaradıcılığında Qarabağ mövzusunun aparıcı xətt olduğunu və bu mövzuda qələmə aldığı əsərlərin gələcək nəsillər üçün müstəsna dəyərini, tarixi əhəmiyyətini qeyd edib.

Tədbirdə Əməkdar jurnalist Tahir Aydınoğlu müəllifin Vətən sevgisi ilə qələmə aldığı hər bir əsərinin əhəmiyyətindən danışıb.

Tədbirdə iştirak edən qonaqlar Ulduz Qasımın yaradıcılığının müxtəlif çalarlarını vurğulayaraq, məhsuldar və həm də olaylara fərqli baxış sərgiləyən bir yazar kimi geniş oxucu kütləsinə malik olduğunu qeyd ediblər. Müəllifin qələmə aldığı bütün əsərlərdə müşahidə edilən yazı üslubu və hadisələrin canlı təsviri, eləcə də oxucuları riqqətə gətirən səhnələr haqqında danışıblar. Həmçinin bu əsərlərin xarici dillərə tərcümə olunması və daha geniş oxucu auditoriyasında təbliğ olunması zəruriyyətini vurğulayıblar.

Sonda müəllif Ulduz Qasım bu tədbirin məhz mədəniyyət ocağı olan gənclər kitabxanasında təşkil olunmasından böyük məmnunluq hissi duyduğunu qeyd edərək, tədbirin təşkilinə görə kitabxanaya öz dərin minnətdarlığını bildirib.

Tədbirin sonunda müəllif kitablarını imzalayaraq, qonaqlara hədiyyə edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.