Respublika Gənclər Kitabxanası Əhməd Cavadın 130 illiyi münasibətilə sərgi və videomateriallar hazırlayıb
Bakı, 5 may, AZƏRTAC
Mayın 5-də Respublika Gənclər Kitabxanası görkəmli şair Əhməd Cavadın həyat və yaradıcılığına həsr olunmuş virtual sərgi və videomaterialı onlayn rejimdə istifadəçilərin ixtiyarına verib.
Kitabxanadan AZƏRTAC-a bildirilib ki, “Əhməd Cavad 130” adlı virtual sərgi və “Milli istiqlal şairi Əhməd Cavad 130” adlı materialda görkəmli şair, ictimai xadim Əhməd Cavadın 130 illik yubileyinin keçirilməsi haqqında imzalanan Sərəncamın mətni, ədibin həyat və yaradıcılığını əks etdirən məlumatlar, onun haqqında söylənilən dəyərli fikirlər yer alıb. Burada Əhməd Cavadın müəllifi olduğu əsərlər, haqqında yazılan kitablar, dünya klassiklərindən tərcümə etdiyi əsərlər haqqında məlumat verilib. Əhməd Cavadın yaşadığı dövrün çətinlikləri, ictimai-siyasi mürəkkəbliyi də materiallarda əks olunub. Əhməd Cavadın adını Azərbaycanın istiqlaliyyət tarixinə yazan, müəllifi olduğu Azərbaycanın Dövlət Himninin və “Çırpınırdı, Qara dəniz” əsərlərinin yazılma tarixi, müəllifin uzun illər təqiblərə, əsassız ittihamlara məruz qalması haqqında faktlar, habelə özünün və ailə üzvlərinin yaşadığı çətinliklər də materiallarda əksini tapıb.
Hazırlanan videomateriallar kitabxananın rəsmi saytında və sosial şəbəkələrindəki hesabında yerləşdirilib.
Bölmənin digər xəbərləri
