® “Davamlı gələcəyə doğru” – “Samsung Electronics” ağacəkmə aksiyası keçirib
Bakı, 30 aprel, AZƏRTAC
“Samsung Electronics” şirkəti “Care Group” şirkəti ilə birlikdə “Davamlı gələcəyə doğru” adlı ağacəkmə aksiyası keçirib.
Qlobal təbiəti mühafizə strategiyasına uyğun olaraq kampaniya çərçivəsindəki tədbirlərə “Samsung Electronics” şirkətinin Azərbaycandakı rəsmi nümayəndəliyi də öz töhfəsini verib.
Şirkətin əməkdaşları Bakının Müşfiqabad qəsəbəsində ayrılan xüsusi yaşıllaşdırma zonasında 100 ağac əkdilər. Təbii ki, ağacların seçimində zeytun və şam ağacı kimi endemik bitkilərə yer verilib.
“Samsung Electronics” şirkətinin “Everyday Sustainability” strategiyasına əsasən, qlobal iqlim dəyişikliyinin qarşısının alınması və təbiəti mühafizə məqsədilə yaşıl texnologiya nəinki istehsal prosesinin zərərsizliyinin təşkili, həmçinin məhsulların tərkibinin müəyyənləşdirilməsində həlledici rol oynayır.
Bu aksiya vasitəsilə “Samsung” və onun əməkdaşları ekoloji dəyərlərə gündəlik həyatlarında da önəm verdiyini nümayiş etdiriblər.
“Samsung”un təbiəti mühafizə strategiyasının əsas məqsədi planetin sərvətlərini nəzərə almaqla insanlar üçün sağlam və işıqlı gələcəyinə qurulması istiqamətində atılan qlobal təşəbbüslərə dəstək olmaqdır. Lakin şirkət planet qarşısında öhdəliyini təkcə yaşıllaşdırmaya dəstəkdə deyil, həmçinin mövcud tullantının faydalı istifadəsi, təkrar emal və tullantısız istehsal yanaşmasında görür.
Hazırda “Samsung” bütün cihazların dizaynından istehsalına qədər olan dövriyyəsində planetin ehtiyac və təhlükələrini nəzərə alır. Məsələn, dizaynda əlavə sərvətlərin istifadəsini tələb edən bütün elementlər ardıcıl şəkildə ləğv olunur. Bundan başqa, cihazların istehsalında getdikcə daha çox atılmış plastikdən, o cümlədən okeana atılmış balıq torları və plastik butulkalardan əldə edilən təkrar emal materialından, eyni zamanda, istehsal prosesində əmələ gələn qalıq alüminiumdan geniş şəkildə istifadə olunur ki, istismar müddəti bitəndən sonra cihaz flora və faunaya ekoloji zərər vurmasın.
2018-ci ildən başlayaraq “Samsung” qab dizaynında da plastikdən istifadəni və paketi təşkil edən elementlərin sayını azaldaraq, təkrar emal edilmiş yüksək keyfiyyətli kağız ilə çalışmağa başlayıb. Şirkətin məqsədi özünün ərsəyə gətirdiyi sellülozdan hazırlanmış kağız yaratmaq, həmçinin ekodizaynlarını tanıtmaqdır.
“Samsung” üçün “Everyday Sustainability” strategiyasının əsas məntiqi kiçik addımlara dəyər verməyi tərənnüm edir. Müəlliflərin fikrincə, hər kəs planetin dayanıqlılığı uğrunda bircə addım atarsa, böyük və ciddi dəyişikliklərə nail olmaq mümkündür.
Bununla bərabər, şirkət planetin sərvətlərinə qayğı ilə yanaşan, atılmış materiallardan faydalanmaqla onlara ikinci həyat verən, istifadəçilərə dürüst dəyərlər təqdim edən innovasiyaların ardınca getməyə çalışır.
Bölmənin digər xəbərləri
