® Milli Biznesin İnkişafı Forumunun ikinci xüsusi sessiyası təşkil olunub
“Biz islahatlara hazırıq!” şüarı ilə Milli Biznesin İnkişafı Forumunun ikinci xüsusi sessiyası baş tutub. Tədbir Rəqəmsal İnkişaf və Nəqliyyat Nazirliyinin dəstəyi, “Caspian Energy Club” və Azərbaycan Milli Biznes Assosiasiyasının birgə təşkilatçılığı ilə, Biznes mühiti və beynəlxalq reytinqlər üzrə Komissiyanın “Fiziki infrastruktur” işçi qrupu çərçivəsində təşkil olunub.
Bu barədə “Caspian Energy Club”ın sədri və qrupun baş icraçı direktoru Telman Əliyev məlumat verib.
Forumda 150-dən çox iştirakçı bir araya gələrək ölkənin kommunal infrastrukturunun inkişafı və təkmilləşdirilməsi mövzusunu müzakirə ediblər. Müzakirələr əsnasında qaz, elektrik enerjisi və su təchizatı sahələrində mövcud çətinliklər, innovativ həllər, dövlət-özəl sektor əməkdaşlığı imkanları iştirakçıların diqqətinə çatdırılıb.
Forumda dövlət qurumlarının nümayəndələri, o cümlədən "Azəriqaz" İB, "Azərişıq" ASC və Azərbaycan Dövlət Su Ehtiyatları Agentliyinin (ADSEA) rəhbər şəxsləri, eləcə də böyük, orta və kiçik şirkətlərin sahibkarları və rəhbərləri iştirak ediblər. Forumun əsas məqsədi dövlət və özəl sektorları arasında səmərəli dialoqu gücləndirmək, qarşılıqlı əməkdaşlıq üçün yeni imkanlar yaratmaq, sahibkarlıq fəaliyyətində üzə çıxan çətinliklərin açıq müzakirəsini təmin etmək və bu problemlərin həll yollarını müəyyənləşdirmək olub.
Açılış mərasimində Milli Biznesin İnkişafı Forumunun Təşkilat Komitəsinin sədri Günel Quliyeva çıxış edərək iştirakçılara tədbir haqqında ətraflı məlumat təqdim edib. Sonra Telman Əliyevin və tədbirin beynəlxalq tərəfdaşlarından biri olan “Sensemi DMCC Dubai” şirkətinin Azərbaycan filialının inzibati məsələlər üzrə direktor müavini Məhəmmədrıza Farahaninin çıxışları dinlənilib.
Panel müzakirələrində “Azərişıq” ASC-nin sədrinin birinci müavini Ramil Yusifov, “Azəriqaz “ İB-nin Baş direktorunun birinci müavini Nail Abdullayev və Azərbaycan Dövlət Su Ehtiyatları Agentliyinin tabeliyində İri Şəhərlərin Birləşmiş Su Təchizatı Xidmətinin İdarə Heyətinin sədrinin müavini Cabbar Cabbarlı müasir çağırışlar, xidmət keyfiyyəti və özəl sektorla əməkdaşlıq imkanlarını müzakirə ediblər, müvafiq sahələr üzrə yenilikləri, cari vəziyyəti və perspektivləri iştirakçıların diqqətinə çatdırıblar.
Sessiyanın ikinci hissəsi qapalı formatda davam edib. Bu mərhələdə keçirilən interaktiv sual-cavab sessiyası zamanı “Azərişıq” ASC, “Azəriqaz” İB və ADSEA nümayəndələri rəqəmsallaşma sahəsində atılan mühüm addımlar barədə məlumat veriblər. Xüsusilə, tətbiq edilən müasir texnoloji həllər, vətəndaşlara və sahibkarlara göstərilən elektron xidmətlərin təkmilləşdirilməsi istiqamətində atılan mühüm addımlar və elektron xidmət platformalarında tətbiq edilən yeniliklər sahibkarlar tərəfindən yüksək qiymətləndirilib. Eyni zamanda, rəqəmsal platformalarda üzə çıxan bəzi texniki və prosedur məsələlər də iştirakçıların diqqətini cəlb edib və ətraflı müzakirəyə səbəb olub.
Qapalı müzakirələr zamanı sahibkarların fərdi müraciətləri dinlənilib, problemlər üzrə təhlillər və konstruktiv müzakirələr aparılıb. Əldə olunan nəticələr əsasında bir sıra məsələlərin operativ həlli üçün təkliflər irəli sürülüb. Həmin məsələlərin daha ətraflı araşdırılması məqsədilə müvafiq dövlət qurumları ilə görüşlər təyin olunub.
Tədbirin sonunda təqdimatçılara və iştirakçı dövlət qurumlarının nümayəndələrinə təşəkkürnamələr, bir sıra şirkət rəhbərlərinə isə “Caspian Energy Club”ın rəsmi üzvlük statusunu təsdiq edən sertifikatlar verilib.
Forumunun sonunda iştirakçılara “networking” üçün çay-kofe mərasimi təşkil edilib. Bu hissədə forumda iştirak edən özəl sektor nümayəndələri fəxri qonaqlarla qeyri-rəsmi şəraitdə səmimi müzakirələr apararaq əməkdaşlıq perspektivlərini müəyyən edib, həmçinin fəaliyyətlərini asanlaşdıra bilən təklifləri dövlət rəsmilərinin diqqətinə çatdırıb və bu barədə müzakirə ediblər.
Bölmənin digər xəbərləri
