® Özbəkistan cərrahları Mərkəzi Gömrük Hospitalında ustad dərslərində iştirak ediblər
Özbəkistanın müxtəlif tanınmış tibb müəssisələrini təmsil edən cərrah həkimlərdən ibarət 10 nəfərlik nümayəndə heyəti Mərkəzi Gömrük Hospitalında ustad dərslərində iştirak ediblər.
Əvvəlcə Hospitalda nümayəndə heyəti ilə görüş keçirilib. Görüşdə Mərkəzi Gömrük Hospitalının rəisi - Baş həkimi, tibb elmləri doktoru Bəxtiyar Musayev, rəis müavini Nabil Seyidov, Ümumi Cərrahiyyə şöbəsinin ümumi cərrahı, tibb elmləri doktoru Aynur Səfiyeva, Daşkənd Tibb Akademiyasının Ürgənc şəhərindəki filialının Ümumi Cərrahiyyə kafedrasının müdiri Dilşad Sanaev, Daşkənd şəhər 1 nömrəli Respublika Klinik Xəstəxanasının həkim-proktoloqu Abdusand Şermatov və Özbəkistandan gəlmiş digər rəsmi qonaqlar iştirak ediblər.
Baş həkim Bəxtiyar Musayev Mərkəzi Gömrük Hospitalının fəaliyyət istiqamətləri, tibb sahəsində tətbiq edilən innovativ texnologiyalar, beynəlxalq əməkdaşlıq layihələri və uğurla həyata keçirilən tibbi xidmətlər barədə, eləcə də 2025-ci ilin fevral ayında Azərbaycanda ilk dəfə meyit donordan canlıya köçürülmüş qaraciyər transplantasiyası əməliyyatı barədə ətraflı məlumat verib. Qeyd edilib ki, Mərkəzi Gömrük Hospitalında kardiologiya, invaziv kardiologiya, ümumi və laparoskopik cərrahiyyə, urologiya, travmatologiya, ginekologiya, radiologiya, pediatriya və bir çox ixtisaslaşdırılmış sahələr üzrə yüksək səviyyədə tibbi xidmətlər göstərilir, eyni zamanda, dünyanın müxtəlif ölkələrindən olan qabaqcıl tibb müəssisələri və universitetləri ilə sıx əməkdaşlıq həyata keçirilir.
Özbəkistandan olan həkimlər Hospitalın cərrahı Aynur Səfiyevanın icra etdiyi bir neçə cərrahi əməliyyatı birbaşa izləyib, müasir texnologiyaların tətbiqi ilə həyata keçirilən müdaxilələr barədə ətraflı məlumat əldə ediblər. Cərrahi əməliyyatlar zamanı istifadə edilən müasir metodlar, pasiyentə yanaşma prinsipləri nümayəndələrin xüsusi marağına səbəb olub.
Səfər çərçivəsində keçirilən praktiki və nəzəri təlimlər Azərbaycan-Özbəkistan tibb ictimaiyyəti arasında elmi əməkdaşlığın möhkəmlənməsinə və təcrübə mübadiləsinə töhfə verməklə yanaşı, gələcəkdə birgə layihələrin həyata keçirilməsi üçün də zəmin yaradıb.
Bölmənin digər xəbərləri
