ELM VƏ TƏHSİL
"II Beynəlxalq Rəsulzadə qiraətləri" mövzusunda konfrans keçirilib
![](/files/galleryphoto/2024/1/1200x630/17067766193700040461_1200x630.jpg)
![](/files/galleryphoto/2024/1/1200x630/17067766191628641239_1200x630.jpg)
![](/files/galleryphoto/2024/1/1200x630/17067766193780435245_1200x630.jpg)
![](/files/galleryphoto/2024/1/1200x630/1706776619757543653_1200x630.jpg)
![](/files/galleryphoto/2024/1/1200x630/1706776619536846396_1200x630.jpg)
![](/files/galleryphoto/2024/1/1200x630/17067766194890538468_1200x630.jpg)
Bakı, 1 fevral, AZƏRTAC
Bakıda Azərbaycan Xalq Cümhuriyyətinin (AXC) qurucu liderlərindən biri olan Məhəmməd Əmin Rəsulzadənin 140 illik yubileyi münasibətilə "II Beynəlxalq Rəsulzadə qiraətləri" mövzusunda konfrans keçirilib.
AZƏRTAC xəbər verir ki, konfransın təşkilatçıları “Rəsulzadə ev-muzeyi ictimai qrupu”, Milli Azərbaycan Tarixi Muzeyi, Xəzər Universiteti, Ankara Universiteti, Varşava Universiteti və VMF Holdinqdir.
Xalq artisti Alim Qasımovun səsləndirdiyi musiqidən sonra "Rəsulzadə ev-muzeyi ictimai qrupu”nun təmsilçisi Solmaz Rüstəmova-Tohidi konfrans iştirakçılarını salamlayıb.
Daha sonra Milli Azərbaycan Tarixi Muzeyinin direktoru Nailə Vəlixanlı, Xəzər Universitetinin təsisçisi Hamlet İsaxanlı, Varşava Universitetindən Yan Malinski, Ankara Universitetinin rektoru Necdet Ünüvar və VMF Holdinqin rəhbəri Vahid Mustafayev çıxış ediblər. Çıxışlarda M.Ə.Rəsulzadənin çoxşaxəli irsinin tədqiqinin və öyrənilməsinin davam etdirilməsi üçün belə tədbirlərin keçirilməsinin zəruriliyi vurğulanıb.
Sonra “Rəsulzadə ev-muzeyi ictimai qrupu” tərəfindən virtual formatda hazırlanmış layihə təqdim olunub.
Tədbirdə çıxış edən AMEA-nın prezidenti akademik İsa Həbibbəyli bildirib ki, Azərbaycan Xalq Cümhuriyyətinin qurucularının şərəfinə Bakıda abidə ucaldılıb və onların xatirələri daim anılır. AMEA-nın bir sıra institutlarında onların irsi tədqiq olunur. “Azərbaycan Milli Ensiklopediyası” Elmi Mərkəzində isə Cümhuriyyət şöbəsi fəaliyyət göstərir.
Polşanın ölkəmizdəki səfiri Rafal Poborski M.Ə.Rəsulzadənin əsərlərinin ölkəsində daha geniş tədqiq olunduğunu söyləyib.
Türkiyədən Səbahəddin Şimşir və Fransadan Georgi Mamulia M.Ə.Rəsulzadə irsinin Vətənindən uzaqlarda da tədqiq olunduğunu tədbir iştirakçılarının diqqətinə çatdırıblar.
Əməkdar incəsənət xadimi, professor Zümrüd Axundova-Dadaşzadə qeyd edib ki, M.Ə.Rəsulzadə AXC qurucularından biri, dərin məzmunlu ədəbi və publisistik əsərlərin müəllifi olmaqla yanaşı, həm də görkəmli milli sima kimi qəbul edilir.
Ailə üzvləri adından M.Ə.Rəsulzadənin nəvəsi Rais Rəsulzadə konfransın təşkilatçılarına təşəkkürünü bildirib.
Sonda Xəzər Universitetinin Kamera orkestrinin konserti təqdim olunub.