® “Veysəloğlu” Acarıstanda: yeni tərəfdaşlıqlar və investisiya imkanları gündəmdə
“Veysəloğlu Şirkətlər Qrupu” Acarıstan Muxtar Respublikasında keçirilən yüksəksəviyyəli biznes görüşlərində iştirak edərək regionun investisiya potensialı, iqtisadi inkişaf perspektivləri və Azərbaycan şirkətləri ilə mümkün əməkdaşlıq istiqamətlərini müzakirə edib.
Görüşlər 2–5 sentyabr 2026-cı il tarixlərində Batumidə keçirilən “Grand CEO Tour” işgüzar səfər proqramı çərçivəsində baş tutub. Səfərdə “Veysəloğlu Şirkətlər Qrupu”nun Qrup CEO-nun Korporativ Funksiyalar üzrə müavini İlqar Nuri iştirak edib.
Səfərin əsas istiqamətlərindən biri Azərbaycan və Gürcüstan arasında biznes və investisiya əlaqələrinin inkişaf etdirilməsi, şirkətlər arasında yeni tərəfdaşlıq imkanlarının müəyyənləşdirilməsi və Acarıstanın prioritet iqtisadi sahələr üzrə potensialının Azərbaycan biznes dairələrinə təqdim olunması olub.
İlqar Nuri Acarıstan Muxtar Respublikasının hökumət başçısı Zurab Pataradze və maliyyə və iqtisadiyyat naziri Ednar Nataridze ilə keçirilən görüşlərdə iştirak edib. Müzakirələr zamanı regionun iqtisadi inkişaf strategiyası, investisiya mühiti, biznes imkanlarının genişləndirilməsi və Azərbaycan şirkətləri üçün potensial əməkdaşlıq istiqamətləri nəzərdən keçirilib.
Görüşlərdə, həmçinin Acarıstanın turizm və infrastruktur sahələrində inkişaf dinamikası, həyata keçirilən və perspektiv layihələr, eləcə də regionun yeni investisiyaların cəlb edilməsi baxımından imkanları barədə fikir mübadiləsi aparılıb.
Azərbaycan biznes çevrəsinin iştirakı ilə keçirilən görüşlər şirkətlərin regional biznes əlaqələrinin inkişaf etdirilməsi, yeni tərəfdaşlıqların araşdırılması və potensial investisiya imkanlarının dəyərləndirilməsi baxımından əhəmiyyət daşıyıb.
Səfər çərçivəsində Azərbaycan nümayəndə heyəti Acarıstan Muxtar Respublikasının hökumət başçısı Zurab Pataradze, maliyyə və iqtisadiyyat naziri Ednar Nataridze, Batumi şəhərinin meri Qiorqi Tsintsadze, eləcə də DEİK Türkiyə-Gürcüstan İşgüzar Şurasının sədri Osman Çalışkan Mzhavanadze və assosiasiya üzvləri ilə görüşlər keçirib.
Sentyabrın 3-də Zurab Pataradze ilə keçirilən görüş zamanı Acarıstan Muxtar Respublikasına “Caspian Business Award” mükafatı təqdim olunub. Acarıstan “Turizm sektoruna investisiya üçün ən əlverişli region” (“Best Region for Investment in the Tourism Sector”) nominasiyası üzrə birinci yerə layiq görülüb.
Bununla yanaşı, səfərdə iştirak edən şirkətlərin nümayəndələri potensial yerli biznes tərəfdaşları ilə fərdi B2B görüşlər keçiriblər. Görüşlər zamanı qarşılıqlı əməkdaşlıq imkanları müzakirə olunub, gələcək biznes əlaqələri üçün ilkin razılaşmalar və yeni işgüzar kontaktlar formalaşdırılıb.
Proqramın investisiya yönümlü hissəsi çərçivəsində iştirakçılar Gürcüstanın Goderdzi dağ-xizək kurortunda keçirilən “Investment Forum”da iştirak edib, Batumi Dəniz Limanı, Nobel Qardaşları Texnologiya Muzeyi və bir sıra istehsal müəssisələri ilə tanış olublar. Bu səfərlər regionun turizm, logistika, istehsal və infrastruktur imkanlarının daha yaxından öyrənilməsinə şərait yaradıb.
“Grand CEO Tour” haqqında
“Grand CEO Tour” “Caspian Energy Club” və Azərbaycan Milli Biznes Assosiasiyasının (MİLLİ.BİZ) birgə təşkilatçılığı, “Caspian Service” şirkətinin sponsorluğu ilə keçirilib. Proqramın əsas məqsədi Azərbaycan və Gürcüstan biznes dairələri arasında birbaşa əlaqələrin qurulması, investisiya və tərəfdaşlıq imkanlarının araşdırılması, eləcə də regional biznes dialoqunun genişləndirilməsi olub.
Səfərdə “Amexline”, “Azərsun Holding”, “Azmetco”, “Bureau 19”, “Caspian Services”, “Certspmc Services Limited”, “Debet Safety”, “Eight Group”, “Liv Hospital”, “Sabah Investment Group”, “Veyseloğlu Group of Companies” və digər şirkətlərin rəhbər və nümayəndələri iştirak ediblər.
“Caspian Energy Holding” haqqında qısa məlumat
İnvestisiya-konsaltinq holdinqi formatında fəaliyyət göstərən“Caspian Energy Holding” 2025-ci ildə “Caspian Energy” brendi altında birləşmiş bütün networking platformalar, media layihələr, forumlar və mükafatları vahid "Milli.Biz" ekosistemi daxilində konsolidasiya etmək məqsədilə təsis edilmişdir. "Milli.Biz" ekosistemi əsasında “Caspian Energy Club”, Avropa ilə İqtisadi Əməkdaşlıq İctimai Birliyi və Azərbaycan Milli Biznes Assosiasiyası vasitəsilə 100-dən çox ölkədən olan sahibkarlara networking qurmaq imkanı yaradılacaq.
“Caspian Energy Holding”in tərkibinə aşağıdakı qruplar daxildir: “Caspian Energy Club”, “Caspian Energy Club International”, “Caspian Energy EXIFOR Group”, “Caspian Energy International Media Group”, “Award Organizers Group”, “Caspian Energy Research Group”,“Caspian Energy Entertainment Group”, “Caspian Energy Jobs Group”.
“Caspian Energy Club”a daxil olan sahibkarlar vahid "Milli.Biz" ekosistemi çərçivəsində hal-hazırda mövcud olan bütün xidmətlərlə yanaşı, hüquq, maliyyə, turizm, konsaltinq və digər xidmətlərdən yararlana biləcəklər. "Milli.Biz" ekosisteminə inteqrasiya olunan qlobal loyallıq proqramı da tətbiq ediləcək.
2002-ci ildə dünyanın iri transmilli, dövlət və özəl neft-qaz və enerji şirkətləri tərəfindən yaradılan, mənzil-qərargahı Bakıda yerləşən “Caspian Energy Club” dünyanın 50 ölkəsindən 5000-dən çox şirkəti birləşdirən və dinamik inkişaf edən beynəlxalq biznes networking platformasıdır. “Caspian Energy Club” biznes-hökumət dialoqunun fəal iştirakçısıdır və əsas məqsədlərindən biri, Azərbaycanda və “Caspian Energy Club”ın fəaliyyət göstərdiyi digər ölkələrdə investisiya və işgüzar mühitin yaxşılaşdırılmasıdır.
“Caspian Energy Club International” 2023-cü ildə “Caspian Energy Club”ın beynəlxalq layihələrini və dünyanın 63 şəhərində fəaliyyət göstərən xarici ofisləri vahid standartlar əsasında idarə etmək məqsədilə yaradılmışdır. Bu strukturun nəzdində idarə olunan və 2034-cü ilə qədər dünyanın 100 ölkəsində nümayəndəlik açılması planlaşdırılan Azərbaycan Milli Biznes Assosiasiyası (MİLLİ.BİZ) – ölkə daxilində və ölkə hüdudlarından kənarda Azərbaycan sahibkarlarını birləşdirən, regionlarda istehsal olunan məhsul və xidmətləri beynəlxalq bazarlara çıxaran, həmçinin regionlara beynəlxalq investisiyaların cəlb edilməsində aktiv rol oynayan vahid işgüzar platformadır.
Bölmənin digər xəbərləri
