Azərbaycanın yaratdığı yeni reallıq konkret nəticələrlə nümayiş olunur ŞƏRH
Bakı, 16 sentyabr, AZƏRTAC
Qarabağ və Şərqi Zəngəzurda həyata keçirilən genişmiqyaslı bərpa və quruculuq işləri Azərbaycanın postmünaqişə dövründə qarşıya qoyduğu strateji məqsədlərin əsas istiqamətlərindən biridir. İşğaldan azad edilmiş ərazilərdə şəhər və kəndlərin yenidən qurulması, müasir infrastrukturun yaradılması, əhalinin Böyük Qayıdış çərçivəsində doğma torpaqlarına köçürülməsi və regionun iqtisadi potensialının bərpası artıq real nəticələrlə müşayiət olunur. Beynəlxalq diplomatik korpusun Xankəndi, Şuşa və Kəlbəcərə son səfərləri isə bu prosesin yalnız ölkə daxilində deyil, beynəlxalq müstəvidə də təqdim edilməsi baxımından mühüm siyasi əhəmiyyət daşıyır.
Bu sözləri AZƏRTAC-a açıqlamasında politoloq Aytən Qurbanova söyləyib.
O bildirib ki, xarici ölkələrin nümayəndələri bu gün Xankəndidə yaradılan yeni şəhər infrastrukturunu, Qarabağ Universitetinin fəaliyyətini, Şuşada bərpa edilən tarixi-mədəni irsi, Kəlbəcərdə həyata keçirilən iqtisadi və sosial layihələri birbaşa müşahidə edirlər. Beləliklə, Azərbaycanın yaratdığı yeni reallıq yalnız siyasi bəyanatlarla deyil, konkret nəticələrlə nümayiş olunur. Xankəndinin yenidən qurulması bu nöqteyi-nəzərdən xüsusi əhəmiyyət daşıyır. Şəhərin nəqliyyat, sosial və mədəni infrastrukturu ilə yanaşı, təhsil və istehsal imkanlarının inkişaf etdirilməsi göstərir ki, məqsəd yalnız dağıdılmış şəhərin bərpası deyil, burada davamlı və müasir yaşayış mühitinin formalaşdırılmasıdır.
Qarabağ Universitetinin fəaliyyəti bu siyasətin mahiyyətini göstərən mühüm nümunədir. Təhsil, məşğulluq və sosial infrastrukturun paralel inkişafı Xankəndinin regionun gələcək həyatında mühüm rol oynayacağını göstərir. Şuşanın bərpası isə prosesin tarixi-mədəni aspektini ön plana çıxarır. Şəhərdə tarixi abidələrin bərpası, küçə və məhəllələrin yenilənməsi, mədəniyyət obyektlərinin istifadəyə verilməsi Azərbaycanın milli-mədəni irsin qorunmasına verdiyi əhəmiyyətin göstəricisidir. Eyni zamanda, Şuşanın beynəlxalq tədbirlərin keçirildiyi məkana çevrilməsi şəhərin yalnız tarixi əhəmiyyətini deyil, Azərbaycanın müasir diplomatik və mədəni həyatındakı rolunu da artırır. Məhz bu nöqteyi-nəzərdən yanaşdıqda, Şuşanın bərpası keçmişin qorunması ilə gələcəyin qurulmasının vəhdətini ifadə edir. Kəlbəcərdə aparılan işlər isə Qarabağ və Şərqi Zəngəzurun iqtisadi potensialının hərəkətə gətirilməsinin strateji əhəmiyyətini göstərir. Kəlbəcərin zəngin təbii ehtiyatları, mineral su mənbələri, hidroenerji imkanları və turizm potensialı rayonun gələcək inkişafında mühüm rol oynaya bilər. “İstisu” kimi layihələrin həyata keçirilməsi də bu potensialın iqtisadi dövriyyəyə cəlb edilməsinə hesablanıb.
Politoloq qeyd edib ki, regionda enerji və nəqliyyat infrastrukturunun inkişaf etdirilməsi Qarabağ və Şərqi Zəngəzurun Azərbaycanın ümumi iqtisadi məkanına daha sıx inteqrasiyasına imkan yaradır. Bütün bunlar göstərir ki, Azərbaycanın Qarabağ siyasəti yalnız ərazilərin fiziki bərpası ilə məhdudlaşmır. Burada daha geniş strateji yanaşma mövcuddur. Diplomatik korpusun səfərləri bu baxımdan Azərbaycanın informasiya və diplomatiya siyasətinin də mühüm elementidir.
“Ən mühüm məqam isə ondan ibarətdir ki, burada söhbət yalnız müharibənin nəticələrinin nümayiş etdirilməsindən getmir. Əksinə, beynəlxalq nümayəndələr dağıntıların yerində yeni yaşayış məntəqələrinin, yolların, məktəblərin, xəstəxanaların, enerji və sosial obyektlərin yaradılmasını görürlər. Bu isə Azərbaycanın postmünaqişə siyasətinin əsas mahiyyətini, yəni dağıntıdan inkişafa keçidi əyani şəkildə ortaya qoyur. Digər tərəfdən isə Qarabağ və Şərqi Zəngəzurda formalaşan yeni iqtisadi və nəqliyyat imkanları regionun gələcək əməkdaşlıq perspektivlərini də genişləndirir. Azərbaycanın bu əraziləri nəqliyyat dəhlizləri, yaşıl enerji, turizm və yeni iqtisadi layihələr baxımından inkişaf etdirməsi Cənubi Qafqazın iqtisadi xəritəsinə təsir göstərə biləcək amillərdəndir. Ona görə də Qarabağın bərpasına yalnız milli miqyaslı quruculuq layihəsi kimi deyil, regionun gələcək iqtisadi və kommunikasiya imkanlarına təsir edən strateji proses kimi yanaşmaq lazımdır", - deyə Aytən Qurbanova vurğulayıb.
Bölmənin digər xəbərləri
