Azərbaycanın suverenliyinə hörmət beynəlxalq münasibətlərin təməl prinsipidir ŞƏRH
Bakı, 15 sentyabr, AZƏRTAC
Azərbaycanın Qarabağ və Şərqi Zəngəzurda öz suverenliyini və ərazi bütövlüyünü tam bərpa etməsi müasir tariximizin mühüm hadisələrindən biridir. Bu tarixi nəticə Prezident İlham Əliyevin uzunmüddətli, məqsədyönlü və uzaqgörən dövlət siyasətinin, güclü ordu quruculuğunun, prinsipial diplomatik fəaliyyətinin və xalqımızın milli həmrəyliyinin nəticəsidir. Azərbaycan öz suverenliyini bərpa etdikdən sonra revanş və qarşıdurma deyil, sülh və əməkdaşlıq gündəliyini irəli sürüb. Ermənistanla sülh müqaviləsinin imzalanması, sərhədlərin delimitasiyası və demarkasiyası, nəqliyyat-kommunikasiya əlaqələrinin bərpası və regionda iqtisadi əməkdaşlığın genişləndirilməsi Azərbaycanın sülh diplomatiyasının əsas istiqamətlərini təşkil edir.
Bu fikirləri AZƏRTAC-a açıqlamasında Milli Məclisin deputatı Mehriban Vəliyeva deyib.
Deputat bildirib ki, Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura səfərinə Ermənistan cəmiyyətinin müəyyən dairələri tərəfindən göstərilən qəbuledilməz reaksiya ciddi narahatlıq doğurur. Xarici diplomatların Azərbaycanın suveren ərazisinə səfər etməsi onların təmsil etdikləri dövlətlərin diplomatik fəaliyyətinin və Azərbaycanın beynəlxalq tərəfdaşlarla açıq əməkdaşlığının bir hissəsidir. Bu səfərə görə xarici diplomatların hədəfə alınması, onlara qarşı təzyiq xarakterli çağırışların səsləndirilməsi beynəlxalq münasibətlərin qəbul edilmiş prinsipləri ilə uzlaşmır.
Azərbaycanın ərazi bütövlüyü və suverenliyi beynəlxalq hüququn fundamental prinsiplərinə əsaslanır. Ermənistanın da Azərbaycanın ərazi bütövlüyünü və suverenliyini tanıması ilə bağlı mövqeyi nəzərə alınarsa, Ermənistan cəmiyyətində Azərbaycanın suveren ərazisinə xarici diplomatların səfərinə qarşı etirazların səsləndirilməsi tamamilə ziddiyyətli mövqedir. Azərbaycanın daxili işlərinə müdaxilə xarakteri daşıyan belə yanaşmalar sülh prosesinin ruhuna xidmət etmir.
Azərbaycanın ərazi bütövlüyünün tanınması yalnız siyasi bəyanatlarla məhdudlaşmamalıdır. Bu prinsipə hörmət ölkəmizin bütün ərazisində həyata keçirilən diplomatik təmaslarda, iqtisadi və humanitar əməkdaşlıqda, beynəlxalq nümayəndə heyətlərinin səfərlərində və tarixi-mədəni irsin öyrənilməsində də özünü göstərməlidir.
Deputat vurğulayıb ki, Qarabağ və Şərqi Zəngəzur Azərbaycanın sosial-iqtisadi həyatına yenidən inteqrasiya olunur, regionun iqtisadi potensialı hərəkətə gətirilir, sahibkarlıq və investisiya imkanları genişləndirilir. Müasir yaşayış məntəqələrinin salınması, şəhərlərin inkişafı, kənd təsərrüfatı, turizm və digər iqtisadi istiqamətlərin bərpası göstərir ki, Azərbaycan azad edilmiş ərazilərində yalnız keçmişi bərpa etmir, gələcəyin müasir və dayanıqlı regionunu formalaşdırır. Qarabağ və Şərqi Zəngəzurda aparılan bu quruculuq Azərbaycanın sülh siyasətinin də mühüm göstəricisidir. Ermənistan cəmiyyətinin müəyyən dairələrinin Gəncəsər və Xudavəng kimi tarixi abidələri yalnız erməni irsi çərçivəsində təqdim etməyə çalışması, eyni zamanda, indiki Ermənistan ərazisində Azərbaycan xalqının çoxəsrlik tarixi-mədəni irsinin mövcudluğunu inkar etməsi ciddi ziddiyyət təşkil edir.
Deputat qeyd edib ki, Prezident İlham Əliyevin həyata keçirdiyi siyasətin mühüm xüsusiyyəti ondan ibarətdir ki, Azərbaycan əldə etdiyi hərbi-siyasi Zəfəri yeni qarşıdurmalar üçün deyil, davamlı sülh və inkişaf üçün əsas kimi qəbul edir. “Böyük Qayıdış” Dövlət Proqramı, şəhər və kəndlərin bərpası, yeni infrastruktur layihələri, tarixi-mədəni abidələrin yenidən qurulması və iqtisadi potensialın dirçəldilməsi Azərbaycanın gələcəyə hesablanmış strategiyasının tərkib hissəsidir. Bu mənada diplomatik korpusun nümayəndələrinin Qarabağ və Şərqi Zəngəzura səfəri də mühüm siyasi və diplomatik məna daşıyır. Xarici diplomatlar azad edilmiş ərazilərdə Azərbaycanın həyata keçirdiyi quruculuq prosesini yerində görür, yeni şəhərlərin, kəndlərin, yolların və sosial obyektlərin yaradılması ilə tanış olurlar. Bu səfərlər Azərbaycanın yeni reallıqlarının beynəlxalq ictimaiyyətə birbaşa təqdim edilməsi baxımından əhəmiyyətlidir. Ermənistan cəmiyyətinin müəyyən dairələrinin bu səfərlərə qarşı göstərdiyi reaksiya isə, əslində, Azərbaycanın yaratdığı yeni reallığın həmin dairələr tərəfindən hələ də tam qəbul edilmədiyini nümayiş etdirir. Azərbaycanın mövqeyi aydındır: ölkəmiz sülhə, təhlükəsizliyə və əməkdaşlığa hazırdır. Azərbaycan artıq bu yeni mərhələnin siyasi, diplomatik və iqtisadi əsaslarını yaradır. Qarabağ və Şərqi Zəngəzurda qurulan yeni həyat isə bu siyasətin ən aydın və əyani ifadəsidir.
Bölmənin digər xəbərləri
