Azərbaycanın suverenliyinin tam bərpası dövlətçilik tariximizin mühüm mərhələsidir ŞƏRH
Bakı, 15 sentyabr, AZƏRTAC
Bu gün qalib və suveren Azərbaycanın yeni hədəflərə doğru inamla irəlilədiyini, qarşıya çıxan çağırışların öhdəsindən yüksək səviyyədə gəldiyini qürur hissi ilə qeyd edirik. Əldə olunan hər bir uğur böyük səylərin və qətiyyətin nəticəsidir. Azərbaycan 44 günlük Vətən müharibəsində tarixi Zəfərə imza atmaqla, 2023-cü ilin sentyabrında həyata keçirilən birgünlük antiterror tədbirləri nəticəsində isə suverenliyini tam bərpa etməklə öz gücünü və imkanlarını bütün dünyaya nümayiş etdirib.
Bu fikirləri AZƏRTAC-a açıqlamasında Milli Məclisin deputatı Malik Həsənov bildirib. Deputat qeyd edib ki, 44 günlük Vətən müharibəsindən üç il sonra – 2023-cü il sentyabrın 19-da Azərbaycanın Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin qalıqlarının tərk-silah edilərək ərazilərimizdən çıxarılması və həmin ərazilərdə Azərbaycan Respublikasının Konstitusiya quruluşunun bərpası məqsədilə antiterror tədbirlərinə başlanılıb.
“Cəmi 23 saat 43 dəqiqə davam edən əməliyyat nəticəsində Azərbaycan Ordusu qarşısında duran bütün vəzifələri yüksək peşəkarlıqla yerinə yetirdi. Bununla da Azərbaycan bütün əraziləri üzərində suverenliyini tam bərpa etdi, dövlət hakimiyyətinin aliliyi və nəzarət funksiyası təmin olundu. Bu, Azərbaycanın dövlət suverenliyinin möhkəmləndirilməsi istiqamətində mühüm mərhələ oldu.
Prezident İlham Əliyevin 2024-cü il 19 sentyabr tarixli Sərəncamı ilə sentyabrın 20-si Dövlət Suverenliyi Günü elan edildi. Bu tarix Azərbaycanın müasir siyasi tarixində dönüş nöqtəsi kimi qiymətləndirilir. 20 Sentyabr Azərbaycan xalqının əsrlər boyu müstəqillik uğrunda mübarizəsinin rəmzi, dövlətin konstitusiya quruluşunun bütün ərazilərdə bərpasının və milli həmrəyliyin təcəssümüdür”, - deyə M.Həsənov bildirib. O vurğulayıb ki, suverenlik dövlətin öz ərazisində ali hakimiyyətə malik olması, daxili və xarici siyasətini müstəqil şəkildə müəyyənləşdirməsidir. Azərbaycanın müasir tarixində Konstitusiya və suverenlik dövlətçilik fəlsəfəsinin əsas sütunlarını təşkil edir. Konstitusiya və suverenlik dövlətlərin hüquqi və siyasi əsaslarını, eyni zamanda, milli kimliyini müəyyən edən mühüm amillərdir. Bu gün Azərbaycanın dövlət suverenliyi tam təmin olunub, ərazilərimiz bütövdür, sərhədlərimiz isə toxunulmazdır. Tam suverenlik şəraitində əsas hədəflər mövcud sabitliyi qorumaq, iqtisadi inkişafı sürətləndirmək və əldə olunan nailiyyətləri daha da artırmaqdır.
Deputat bildirib ki, artıq bir ildən çoxdur regionda sülh gündəliyi yeni mərhələyə qədəm qoyub. Dövlətimizin başçısı ötən ilin avqustunda ABŞ-yə səfəri çərçivəsində Azərbaycan ilə Ermənistan arasında sülh sazişinin mətninin paraflanması, həmçinin Azərbaycan Prezidenti İlham Əliyev, ABŞ Prezidenti Donald Tramp və Ermənistanın baş naziri Nikol Paşinyan tərəfindən Birgə Bəyannamənin imzalanması regionda sülhün təmin edilməsi istiqamətində mühüm addım olub. Bu proses Azərbaycanın ədalətə və beynəlxalq hüquqa əsaslanan siyasətinin nəticəsidir. Regionda dayanıqlı sülh və təhlükəsizlik iqtisadi inkişaf və yeni əməkdaşlıq imkanları üçün əlverişli şərait yaradır.
Azərbaycanın ərazi bütövlüyünün və suverenliyinin tam bərpası ölkəmizin regionda və dünyada mövqeyini daha da möhkəmləndirib. Otuzillik işğal dövrü geridə qalıb. Hazırda ölkəmiz genişmiqyaslı quruculuq və inkişaf mərhələsindədir. Bu proses Azərbaycanın beynəlxalq mövqelərinin daha da möhkəmlənməsinə, regionda yeni reallıqların formalaşmasına imkan verib. İkinci Qarabağ müharibəsinin və antiterror tədbirlərinin nəticələri Azərbaycanın ərazi bütövlüyü və suverenliyinin bərpasını təmin edən tarixi nailiyyət kimi qəbul olunur.
Bölmənin digər xəbərləri
