AB-NİN AZƏRBAYCANA TEXNİKİ YARDIMINI ƏLAQƏLƏNDİRMƏ BÜROSUNUN GENİŞLƏNDİRİLMƏSİ BARƏDƏ QƏRAR QƏBUL EDİLMİŞDİR
Bunu AZƏRTAC-ın müxbirinə ƏB-nin direktoru Əsgər Ələkbərov bildirmişdir. Onun sözlərinə görə, yaxın vaxtlarda büronun tərkibində AB-nin Azərbaycana texniki yardım proqramlarına dəstək departamenti, Avropaya inteqrasiya və TƏS-in reallaşdırılmasına yardım departamenti yaradılacaqdır.
Ə.Ələkbərov xatırlatmışdır ki, hazırda TASİS proqramı xətti ilə ölkəmizdə TƏS-in gerçəkləşdirilməsinə texniki yardım üzrə 2 milyon avro dəyərində ikillik layihə həyata keçirilir. Həmin layihəyə əsasən, AB ekspertləri Azərbaycana gəlir və cari vəziyyəti öyrənməyə və AB ilə yaxınlaşmaq üçün tədbirlər hazırlamağa kömək edirlər. Əsas etibarilə qanunvericilik və inzibati sistemin vəziyyəti və inkişafı, habelə ölkənin Dünya Ticarət Təşkilatına daxil olması məsələsi araşdırılır.
Ekspertlər Bakıda yerli mütəxəssislərin təlimi üçün bir sıra seminarlar keçirməyi planlaşdırırlar. Müxtəlif idarələrin nümayəndələrini cəlb etməklə ayrı-ayrı komponentlər üzrə işçi qrupları yaratmaq da nəzərdə tutulur.
