ABŞ Çindən Hyustondakı baş konsulluğunu bağlamağı tələb edib
Pekin, 22 iyul, AZƏRTAC
ABŞ Çindən Hyuston şəhərindəki diplomatik nümayəndəliyini bağlamağı tələb edib.
AZƏRTAC xəbər verir ki, bunu Çin Xarici İşlər Nazirliyinin rəsmisi Van Venbin iyulun 22-də gündəlik mətbuat konfransında deyib.
Çin XİN rəsmisi ölkəsinin Vaşinqtonun bu qərarını qətiyyətlə pislədiyini bildirərək, Birləşmiş Ştatları yanlış addımlarını düzəltməyə çağırıb. Əks halda Çin cavab təbirləri görəcək.
Qeyd edək ki, son vaxtlar iki dövlət arasında bir çox məsələlər üzrə gərginlik müşahidə olunur. Bura iqtisadi-ticari mübahisələr, Honkonq, Tibet, Sincan-Uyğur muxtar regionu ilə bağlı məsələlər də daxil olmaqla siyasi mövzular, Çinin qabaqcıl texnologiya şirkətlərinə Vaşinqtonun tətbiq etdiyi qadağa və məhdudiyyətlər, COVID-19 virusu ilə bağlı qarşılıqlı ittihamlar, hər iki ölkənin Cənub Çin dənizindəki hərbi fəaliyyəti ilə bağlı məsələlər daxildir. Bəzi ekspertlər ABŞ ilə Çinin "soyuq müharibə"nin astanasında olduğunu, bir qrupu isə bu "müharibə"nin artıq başladığını bildirirlər.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
