ABŞ-da şiddətli fırtınalar nəticəsində 34 nəfər həlak olub
Vaşinqton, 15 aprel, AZƏRTAC
ABŞ-ın cənub-şərqini bürüyən güclü firtınalar nəticəsində ən azı 34 nəfər həlak olub və yüz minlərlə adam elektrik enerjisiz qalıb.
AZƏRTAC xəbər verir ki, Alabama, Corciya, Luiziana və Missisipi ştatlarının administrasiyaları fövqəladə vəziyyət elan edib. Bir sıra əyalətlərdə şiddətli tornadolar, dolu və daşqınlar yüzlərlə evi dağıdıb.
Cefferson-Devis, Cons və Lourens vilayətlərindən keçən çoxsaylı tornadolar nəticəsində ən azı 12 Missisipi sakini həlak olub. Sərt hava səbəbindən Cənubi Karolinada doqquz, Corciyada səkkiz və Tennesidə üç ölüm hadisəsi qeydə alınıb. Arkanzasda və Şimali Karolinada 2 nəfər həlak olub, bir neçə insan itkin düşüb.
Çərşənbə axşamı günü 16 ştatda 560 mindən çox insan işıqsız qalıb. Həmin ştatların administrasiyaları təbii fəlakətin nəticələrini aradan qaldırmaqdan ötrü federal kömək üçün müraciət ediblər. Missisipi ştatının fövqəladə hallar agentliyinin icraçı direktoru Qreq Miçel mətbuat konfransında aprel ayının hava şəraitinin pisləşməsi, tufan və qasırğalar baxımından daha xarakterik olduğunu vurğulayıb.
AZƏRTAC-ın Vaşinqton bürosu
Bölmənin digər xəbərləri
