ABŞ-də reaktiv yanacaq istehsalı rekord həddə çatıb
Bakı, 9 iyun, AZƏRTAC
Hörmüz boğazı bağlandıqdan sonra ABŞ-də reaktiv yanacaq qiymətlərinin artmasına cavab olaraq bu yanacağın istehsalı rekord göstəriciyə yüksəlib.
AZƏRTAC xəbər verir ki, bu barədə ABŞ-nin Enerji İnformasiya Administrasiyasının (EIA) məlumatında deyilir.
Əvvəllər reaktiv yanacaq tədarükünün böyük hissəsini Körfəzdən idxal edən Avropa və Asiyada da xam neftin qiymətlərinin artması və təchizatla bağlı narahatlıqlar bu yanacağın qiymətlərinin artmasına səbəb olub. Daxili ehtiyatlar orta səviyyədən yuxarı qaldığı üçün ABŞ-də artan reaktiv yanacaq istehsalının böyük hissəsi ixrac olunur.
Fevralın 28-də dörd həftəlik orta istehsalın gündəlik 1,7 milyon barel təşkil etdiyi vaxtdan bəri Birləşmiş Ştatlarda reaktiv yanacaq istehsalı artır. ABŞ-də reaktiv yanacaq istehsalının 4 həftəlik orta proqnozu tarixdə ilk dəfə olaraq rekord həddə çatıb və 2 milyon bareli keçib.
“Artan istehsal həm orta səviyyədən yuxarı neft emalı zavodlarının işləməsini, həm də reaktiv yanacaq məhsuldarlığını artırmaq üçün strateji dəyişiklikləri əks etdirir. ABŞ-nin neft emalı zavodları yüksək reaktiv yanacaq qiymətləri mənfəətindən istifadə etmək üçün reaktiv yanacaq istehsalını maksimum dərəcədə artırır. Mart ayından maya qədər ABŞ-nin Körfəz sahilində reaktiv yanacağın spot qiymətləri orta hesabla bir qallon üçün 3,91 dollar təşkil edib ki, bu da ilin əvvəlindəki qiymətdən təxminən iki dəfə çoxdur, eyni zamanda həm benzin, həm də dizel yanacağı üçün regional spot qiymətlərindən daha yüksəkdir. Avropa və Asiyada reaktiv yanacağın qiymətləri mart və aprel aylarında əhəmiyyətli dərəcədə bahalaşıb. Qiymət artımlarına cavab olaraq, ABŞ-də reaktiv yanacaq ixracı aprel və may aylarında rekord həddə çatıb. Avropa və Asiyada reaktiv yanacağın qiymətləri artıq ABŞ-nin Körfəz sahilindəki qiymətlərə yaxındır və reaktiv yanacaq çatışmazlığı ilə bağlı narahatlıqlar aradan qalxdığı üçün hər üç bölgədə qiymətlər aprel ayının maksimumundan aşağıdır”, - deyə EIA-nın məlumatında bildirilir.
Bölmənin digər xəbərləri
