ABŞ-nin hücumu nəticəsində İranda 4 dinc sakin ölüb, 50 nəfər yaralanıb
Bakı, 2 sentyabr, AZƏRTAC
ABŞ-nin ötən gün başlayan raket hücumlarının İranın cənubundakı Sirik şəhərində toy məclisinin keçirildiyi evə dəyməsi nəticəsində, aralarında azyaşlı uşaq da olmaqla dörd nəfər həlak olub, 50-dən çox insan isə yaralanıb.
AZƏRTAC BBC-yə istinadən xəbər verir ki, SEPAH bu zərbələrə görə ABŞ-nin peşman olacağını bəyan edib.
İran cavab olaraq İraq və İordaniyadakı ABŞ hərbi bazalarına, eyni zamanda, Küveyt və Bəhreynə hücumlar təşkil edib. Çərşənbə günü erkən saatlarda isə Sirik hücumuna cavab olaraq, İordaniyanın Əqəbə şəhərindəki ABŞ dəniz piyadaları bazasına doğru çoxsaylı ballistik raketlər buraxılıb. İordaniya Silahlı Qüvvələri 13 ballistik raketin qarşısını aldığını, onlardan 10-unun məhv edildiyini, 3-nün isə ucqar ərazilərə düşdüyünü açıqlayıb. İranın bu hücumu nəticəsində ölən və ya yaralanan olmayıb.
Bundan başqa, Küveyt ordusu çərşənbə günü erkən saatlarda hava hücumundan müdafiə sistemlərinin İranın raket hücumlarına cavab verdiyini bəyan edib.
Bölmənin digər xəbərləri
