ABŞ-nin Yaponiyadakı hərbi bazasında BYD avtomobillərinin istifadəsi qadağan edilib
Pekin, 26 oktyabr, AZƏRTAC
Çinin BYD avtomobillərinin Amerika Birləşmiş Ştatlarının (ABŞ) hərbi hava qüvvələrinin Yaponiyanın Okinava prefekturasındakı bazasına girişi qadağan olunub.
AZƏRTAC xəbər verir ki, bu barədə Yaponiya mediası məlumat yayıb.
Bildirilib ki, qadağanı ABŞ-nin Yaponiyadakı hərbi komandanlığı təhlükəsizliklə əlaqədar tətbiq edib.
Bu addımın məqsədi bazadakı məlumatların nəqliyyat vasitələrinə quraşdırılmış kameralar və sensorlar vasitəsilə sızmasının qarşısını almaqdır.
Oxşar tədbirlər ABŞ-nin Cənubi Koreyadakı və digər yerlərdəki hərbi bazalarında da tətbiq oluna bilər.
Okinavadakı ABŞ qüvvələrinin zabiti Alli Stormer verdiyi bəyanatda BYD avtomobillərinin şəxsi heyət və hərbi baza üçün qəbuledilməz və qarşısı alınmayan risklər yaratdığını deyib. Lakin konkret risklərin nədən ibarət olduğuna dair təfərrüat verməyib.
Qeyd edək ki, Okinavadakı aviabaza Hind-Sakit okean regionunda ABŞ-nin strateji cəhətdən ən əhəmiyyətli hərbi obyektlərindən biridir.
Bu ilin iyununda ABŞ-nin Müdafiə Nazirliyi BYD şirkətini Çin ordusu ilə əlaqəsi olduğu iddia edilən şirkətlər siyahısına daxil edib.
Bölmənin digər xəbərləri
