ABŞ VƏ QAZAXISTAN BAKI-CEYHAN LAYİHƏSİNİN HƏYATA KEÇİRİLMƏSİNDƏ ƏVVƏLKİTƏK MARAQLIDIRLAR
VAŞİNQTON. ABŞ və Qazaxıstan Xəzər bölgəsindən yanacağın dünya bazarlarına nəqli üçün Bakı-Tbilisi-Ceyhan neft kəməri layihəsinin həyata keçirilməsində əvvəlkitək maraqlıdırlar. Bunu Qazaxıstanın dövlət katibi - xarici işlər naziri Qasımcömərd Tokayev ABŞ-ın vitse-prezidenti Riçard Çeyni, dövlət katibi Kolin Pauell və prezidentin milli təhlükəsizlik üzrə köməkçisi Kondoliza Rays ilə görüşlərdən sonra İTAR-TASS-ın müxbiri ilə müsahibəsində bildirmişdir. O təsdiqləmişdir ki, aparılmış danışıqlar zamanı bu mövzuya da toxunulmuşdur.
Qazaxıstan naziri demişdir: “Bizdə belə təəssürat yarandı ki, amerikalılar bu strateji layihənin gerçəkləşdirilməsinə əvvəlkitək maraq göstərirlər. Bu layihədə bizim də marağımız var, bir şərtlə ki, onun texniki-iqtisadi əsaslandırılması müvafiq qaydada hazırlanmış olsun”. Q.Tokayevin sözlərinə görə, bütün əlaqədar tərəflərin, - istər özəl biznesin, istərsə də hökumət qurumlarının,- həmin məsələdə vahid mövqe tutması son dərəcə vacibdir.
Nazir həmçinin demişdir ki, Qazaxıstan neft hasilatının artırılması və onun dünya bazarlarına daşınması yollarına çoxsahəli xarakter verilməsi xəttinə tərəfdardır. Q.Tokayev yanacağın Rusiya ərazisi ilə ixrac marşrutlarının, o cümlədən Xəzər boru kəməri konsorsiumu layihəsinin əhəmiyyətini də vurğulamışdır.
Bölmənin digər xəbərləri
