REGİONLAR
ABŞERONDA FARAŞ KARTOFÇULUĞUN İNKİŞAFI MƏSƏLƏLƏRİ MÜZAKİRƏ OLUNMUŞDUR
Kənd Təsərrüfatı Nazirliyi Hollandiya hökuməti tərəfindən Tovuz rayonunun “Tovuz-Baltiya LTD” şirkətində həyata keçirilən “Kartof toxumçuluğunun inkişafı” layihəsinin nəticələrinin Abşeron rayonunda tətbiqi ilə bağlı fevralın 15-də Elmi Tədqiqat Tərəvəzçilik İnstitutunda elmi-praktik seminar keçirmişdir.
Bakı və Sumqayıt sakinlərini faraş kartof məhsulu ilə təmin etmək, alim-fermer qarşılıqlı münasibətləri yaratmaq məqsədi daşıyan seminarı nazir İrşad Əliyev açaraq, Abşeronda kartofçuluğun tarixindən, əhalının gəlir mənbəyinin artırılmasında bu layihənin əhəmiyyətindən danışdı. Tərəvəzçilik İnstitutu ilə “Tovuz-Baltiya LTD” şirkəti arasında bağlanmış müqaviləyə əsasən 30 hektar torpaq sahəsi ayrıldığını vurğulayan nazir şirkət tərəfindən yüksək reproduksiyalı toxum gətirildiyini, əkin və becərmə işlərinin mexanikləşdirilmiş üsulla Hollandiya texnologiyası ilə aparılacağını bildirdi.
Abşeron rayonu üçün sortların seçilməsi, aqrotexnikanın öyrənilməsi, sort qarışığına yol verilmədən toxumçuluğun təşkil edilməsi məsələləri seminarda diqqət mərkəzində oldu.
Seminarda faraş kartofçuluqla yanaşı, Abşeronda badam, zəfəran, üzüm, əncir yetişdirilməsinin inkişafı məsələlərindən də söhbət getdi.