Adil Kərimli: Mədəniyyət sahəsi üzrə ali təhsillilərin sayı artıb
Bakı, 3 fevral, AZƏRTAC
İncəsənət məktəblərinin kadr təminatının yaxşılaşdırılması ilə bağlı müəllimlərin, direktor və direktor müavinlərinin işə qəbulunda yeni yanaşmalar tətbiq edilir, bu proses elektron qaydada, müsabiqə yolu ilə həyata keçirilir. Yeni işə qəbul olunmuş müəllimlərin 65 faizi ali ixtisas təhsillidir. Mədəniyyət sahəsi üzrə ali təhsillilərin sayı 2023-cü illə müqayisədə 4,13 faiz artıb. Bu, davamlı olan bir prosesdir və hədəfimiz bu rəqəmi daha da artırmaqdır.
AZƏRTAC xəbər verir ki, bu sözləri mədəniyyət naziri Adil Kərimli Nazirliyin 2023–2024-cü illərdəki fəaliyyətinə dair genişləndirilmiş kollegiya iclasında çıxışı zamanı deyib.
Nazir diqqətə çatdırıb ki, Mədəniyyət Nazirliyi bədii təhsil ocaqlarında fəaliyyət göstərən müəllimlərin bilik və bacarıqlarının qiymətləndirilməsini də diqqətdə saxlayır. Bu məqsədlə 2025–2026-cı illər ərzində müəllimlərin attestasiyasının keçirilməsi nəzərdə tutulur.
Muzeylər və rəsm qalereyalarının fəaliyyətindən danışan nazir deyib ki, "Deloitte" şirkəti tərəfindən Azərbaycan Dövlət Rəsm Qalereyasının reyestri və rəqəmsal arxivi yaradılıb. Şirkət tərəfindən, eyni zamanda, Azərbaycan Milli Xalça Muzeyi, Milli Azərbaycan Tarixi Muzeyi, Azərbaycan Musiqi Mədəniyyəti Dövlət Muzeyi və Nizami Gəncəvi adına Milli Azərbaycan Ədəbiyyatı Muzeyində əsərlərin sayımı və barkodlaşdırılması üzrə işlər davam etdirilir.
Bölmənin digər xəbərləri
