ADY-nin sədr müavini: Kürdəmir stansiyasının bərpası regionda nəqliyyat əlçatanlığını artırır
Kürdəmir, 17 aprel, AZƏRTAC
Kürdəmir stansiyasının fəaliyyətinin bərpası da bu siyasətin uğurlu nəticələrindən biridir.
AZƏRTAC xəbər verir ki, bunu Kürdəmir dəmir yolu stansiyasında sərnişindaşıma xidmətinin bərpası münasibətilə keçirilən tədbirdə “Azərbaycan Dəmir Yolları” QSC sədrinin müavini Arif Ağayev bildirib. Onun sözlərinə görə, ölkədə nəqliyyat infrastrukturunun müasirləşdirilməsi və dəmir yollarının yenidən qurulması Prezident İlham Əliyevin rəhbərliyi ilə həyata keçirilən dövlət siyasətinin prioritet istiqamətlərindəndir. Qeyd olunub ki, altı ildən sonra Kürdəmirə qatarla ilk rəmzi səfərin baş tutması bölgə sakinləri üçün əlamətdar hadisədir.
Diqqətə çatdırılıb ki, Kürdəmir stansiyası coğrafi mövqeyinə görə həm beynəlxalq nəqliyyat dəhlizləri, həm də ölkədaxili marşrutlar üzərində yerləşərək mühüm tranzit qovşaq rolunu oynayır. Bu stansiyanın yenidən istifadəyə verilməsi ilə onun üstünlükləri sərnişindaşıma sahəsində də özünü göstərəcək.
Bildirilib ki, stansiya Bakı–Qazax–Bakı, Bakı–Balakən–Bakı, Bakı–Ağdam–Bakı, eləcə də həftəsonu və bayram günlərində Bakı–Ağstafa–Bakı marşrutlarına inteqrasiya olunacaq. Bu isə Kürdəmir və ətraf rayonların – Ağsu, Göyçay, Zərdab və Sabirabadın sakinləri üçün nəqliyyat imkanlarını əhəmiyyətli dərəcədə genişləndirəcək. Vurğulanıb ki, müasir qatarlarla paytaxtdan Kürdəmirə səfər müddəti pandemiyadan əvvəlki dövrlə müqayisədə daha qısa olacaq.
Çıxışda qeyd olunub ki, Kürdəmir istiqamətində sərnişin daşımaları müasir “Stadler” qatarları ilə həyata keçiriləcək və həftənin bütün günləri sərnişinlərə xidmət göstəriləcək.
Arif Ağayev əlavə edib ki, “Azərbaycan Dəmir Yolları” QSC ölkənin bütün regionlarında nəqliyyat əlçatanlığını artırmaq və xidmət coğrafiyasını genişləndirmək məqsədilə pandemiyadan əvvəl mövcud olmuş marşrut və stansiyaların bərpasını mərhələli şəkildə davam etdirir. Bu çərçivədə son illərdə Bakı–Gəncə–Bakı marşrutunun Ağstafaya qədər uzadıldığı, Qəbələyə ilk dəfə sürətli qatar reyslərinin təşkil olunduğu, yeni qatarların istismara verildiyi qeyd edilib.
Bildirilib ki, 2025-ci ildə sərnişindaşıma imkanları daha da genişləndirilib, Bakı–Balakən–Bakı, Bakı–Qazax–Bakı və Bakı–Ağdam–Bakı marşrutları bərpa olunub, eyni zamanda, Gəncə–Qəbələ–Gəncə xətti istifadəyə verilib. Növbəti ildə isə Ağdam–Xankəndi dəmir yolu xəttinin və Xankəndi Dəmir Yolu və Avtovağzal Kompleksinin açılışı planlaşdırılır.
Qeyd olunub ki, həyata keçirilən tədbirlər nəticəsində 2025-ci ildə “Azərbaycan Dəmir Yolları” QSC 10 milyondan çox sərnişinə xidmət göstərərək rekord göstəriciyə nail olub. Bu isə xidmət keyfiyyətinin yüksəldilməsi və sərnişin məmnuniyyətinin təmin edilməsi istiqamətində görülən işlərin uğurlu nəticəsidir.
Sonda Arif Ağayev Kürdəmir sakinlərini təbrik edərək, yenilənmiş stansiyanın onların istifadəsi üçün uğurlu olmasını arzulayıb, vətəndaşları dəmir yolu xidmətlərindən fəal istifadə etməyə və rəy və təklifləri ilə bu sahənin inkişafına töhfə verməyə çağırıb.
Bölmənin digər xəbərləri
